Chokpot jolo chiko chu·onga gita man·jae neng·nikaniko man·tokenga

TURA: South Garo Hills a·jani Chokpot jolrango chirangko chu·onga gita man·jaengani a·sel songni nokni manderang neng·nikanirangko chagrongna nangtokenga ine Chokpot-ni GSU aro Chokpot Area Vigilance Committee (CAVC), songni Nokmarang baksa parakataha.
CAVC-ni chairman Jesswell Ch Marak-ni parakatani gitade, Chokpot jolrango chirangko man·jaengani gimin adita salrangna skangsan uamang Chokpot PHE office-ona re·ange, Chokpot Greater Water Supply Scheme-ni bidingo Sub-Divisional Officer (SDO) in-charge baksa agangrikeahachim. PHE-ni SDO in-charge baksa agangrikon, ia scheme-ni kamrangko ta·raken matchotatna ua ku·rachakaniko on·atahachim ine CAVC-ni chairman parakataha.
“Chokpot Greater Water Supply Scheme-ko 2022 bilsion a·bachengatahachim indiba da·alonan ia scheme-ni kamrangko chinga nikna man·kujaenga. Uni gimin Chokpot jolrango songdongenggipa manderangni namgnina ia water supply scheme-ko ta·rake matchotatchina sorkariko mol·molenga,” ine CAVC-ni chairman parakataha.
Chokpot-o PHE office kam ka·engoba ia jolrango songdongenggipa manderang, batanggimin bilsi 20 batpilen PHE department-ni on·enggipa chirangko man·tokjaenga aro ia jolrango songdongenggipa manderang pilakan Dareng chibimanikosa pilak nanga kamrangna jakkalenga ineba GSU Chokpot unit, CAVC aro songni nokni dilgiparang parakataha.