SHILLONG: Umroi Airport-ko re·baenggipa 2026 bilsini bon·angachibara dal·batatna ka·dongenga ine Bristibar salo a·dok sorkari parakataha.
Iani bidingo kobor ra·timgiparangna talataniko on·angengon, Umroi Airport-ni runway-kode 2026 bilsini bon·angachibara bakrodapatna ka·dongenga ine Meghalaya Democratic Alliance (MDA)-ni ku·wattimgipa aro a·dokni Cabinet Minister Paul Lyngdoh parakataha.
“Airport-ni bidingo a·dokni Chief Minister Conrad K Sangma an·tangan cabinet minister-rangna talate on·manaha aro ia Umroi Airport-ni runway-mangmangkode 2026 bilsini bon·angachibara bakrodapatna man·naba gnang,” ine Lyngdoh aganaha.
Airport-ko dal·batatani bidingo janapatengon, Delhi-oba iani bidingo Ministry-ni gadango chanchirimenga aro a·arangko on·sregrikani bidingo a·dok sorkari aro defence official-rangni agangrikaniba matchotangengaha ine Lyngdoh parakataha.
Umroi airport-oni samba jolrango donggipa dingtang dingtang jillarangona sildoreng bilruraataniko batanggimin somoirango dontongatchengahachim ine nikna man·a.
Silchar aro Agartala-ni gisepo sildoreng bilruraataniko IndiGo dontongatani ja·man, Alliance Air-ba Shillong-Dimapur aro Shillong-Guwahati bilruragipa sildorengrangko dontongatahachim.
SpiceJet-ba Shillong-Kolkata bilruragipa sildorengrangko adita antirangna skangsan dontongataha aro Shillong-Delhi bilenggipa sildorengba antio changgnisan bilruraenga.
Umroi Airport-oni dingtang dingtang biaprangona sildorengrango songre songgabatanio damrang rakbatahani giminba manderang da·o neng·nikanirangko chagrongna nangtokengachim.
