SHILLONG: Inner Line Permit (ILP)-na dabiani bidingo ma·mong sorkari, maming aganchakanirangko on·kujaengani gimin Bangladesh aro dingtang dingtang biaprangoni Meghalaya a·dokona napsrukbaaniko champengna gita Meghalaya Residents Safety & Security Act (MRSSA)-ko mangrakbatatna nangskaenga ine a·dok sorkari aganaha.
“ILP-ko ra·gatchina dabiani ru·uta bilsirangonin bon·chipenga aro chingni opposition-o ong·engmiting somoioba ILP-ni bidingo chanchirimna on·jahani gimin chinga Speaker-ni kosako motion-ko ra·baahachim. Iani ja·mansa Assembly-o ILP-na resolution-ko ra·aha,” ine a·dokni Cabinet Minister aro MDA-ni ku·wattimgipa Paul Lyngdoh aganaha.
ILP-na dabienggipani bidingo ma·mong sorkarini chanchianiko kakket ong·e parakchina aro Bangladesh a·songoni niam gri napsrukanirang batroroengani gimin mikrakchina gita Khasi Students Union, a·dok sorkarina u·iataniko on·ahachim.
ILP-ko on·anide da·o ma·mong sorkarini jakosajok ine janapatskaengon, “Ia kamde ma·mong sorkarini jakosajok. Home Ministry maiko chanchienga angaba ma·sija indiba Meghalaya a·doko Sixth Schedule donga aro Land Transfer Act-ba dongan baksana a·dokni bang·bata biaprangkon Citizenship Amendment Act (CAA)-onikoba wataha ine Union Home Minister-ni agananiko an·ching nikna man·aha,” ine Lyngdoh aganaha.
“ILP-ko man·na gita chinga krengangkugen aro uni gisepon MRSSA-koba chinga mangrakbatatgen,” ine MDA-ni ku·wattimgipa, ku·rachakaniko on·angaha.
MRSSA-ko nambatatna man·kugen ine janapatengon, “ILP-na dabiani bidingo ma·mong sorkarini aganchakaniko senge dongana bate MRSSA-ko bilakbatatanian nambatgipa chol ong·enga,” ine Lyngdoh parakataha.
Meghalaya a·doko niam gri napsrukanirangko champengna aro am·sandina gita namgipa niamrang dongjani gimin KSU-ni pilak unit-rangkon, sima arirango nirokna gita ge·etaniko on·manaha ine adita salrangna skangsan KSU-ni president Lambokstar Marngar aganahachim.
“Meghalaya a·dokona niam gri napsrukanirangko chinga an·tangtangan nirok sandina nangenga aro a·dokona kam ka·e cha·na re·baenggipa manderango nangchongmota lekkarang dongama dongja, uarangko chinga nirikkienga,” ine Marngar aganaha.
Meghalaya Legislative Assembly-o ILP-na 2019 bilsion resolution-ko pass ka·aha indiba unoni maming namdapanirangko nikna man·kujaenga ineba KSU president parakataha.
