TURA: Job Card holder-rangni tangkarangko a·dok sorkari, block-rangona watatjaengani a·selsa songo noko Job Card-ni kamrangko ka·e cha·enggipa manderang, an·tangtangni man·na nangenggipa tangka paisarangko man·jaenga ine Robibar salo, Tura-ni MDC aro Bharatiya Janata Party (BJP)-ni state vice president Bernard N Marak matnangataha.
Marak-ni parakatani gitade, ma·mong sorkarini pilak scheme-rangon grorangko BJP sorkari chotmantokaha indiba a·dok sorkari, tangka paisarangko somoi gita block-rangna watatjaengani a·selsa job card holder-rang tangka paisarangko man·jae neng·nikanirangko chagrongna nangtokengachim.
“Ia scheme-o 90 percent tangkarangko ma·mong sorkari gamenga aro 10 percent-ko a·dok sorkari gamenga. Mitam songni manderangna ia tangkarangko ma·mong sorkarioni on·atjaenga ine tol·na jotton ka·enga indiba kakketode a·dok sorkarisa tangka paisarangko block-rangna on·atjaenga,” ine Marak parakataha.
Manderangni tangka paisarangko ma·mong sorkari cha·bokaha ine songni manderangko altuen togina man·enga ine janapatengon, “Manderangni man·na nangenggipa tangka paisarangko ma·mong sorkaride somoi gitan on·atenga. Block-rang somoi gita matchotgimin kamrangko watatna aro bill-rangko on·aoni sal 15-ni gisepon bill-rangko a·dok sorkari gamatna nanga. Block-rang bill-rangko somoi gita on·na nanga indiba gitcham bilsirangni bill-rangkon online gita update ka·jaenga ine anga nikna man·aha. Muster roll-rango bang·a manderangkon absent ine seengani gimin iarangko Block-rang name am·sandina nanga,” ine Marak parakataha.
Ma·mong sorkario maming dos dongjana gita donatgimin kamrangna tangka paisarangko watatosa block-rangde work order-rangko on·na man·aia ine talataniko on·china gitaba Tura MDC didiataha.
“NREGA-ni ning·o donggipa job card holder-rang, dingtang dingtang neng·nikanirangko chagrongna nangenga indiba bang·bata VEC secretary-rangkon jinma seokgija songasa songe on·engani gimin job card holder-rangni tangka paisarangko man·tokjaengaoba jrip dongrongaia. Tangka paisarangko somoi gita man·jaengani gimin dingtang dingtang songrangoni bang·en badi ka·anirangko man·soaha maina gitcham bilsirangonikoba uamang an·tangtangni man·na nangkuenggipa tangka paisarangko man·tokkujaenga. Iani bidingo chinga am·sandion, job card holder-rangni hajirarangko on·na gita a·dok sorkari, tangka paisarangko block-rangna watatjaenga ine ma·sina man·aha,” ine BJP-ni state vice president parakataha.
 |
ReplyForward
|
