SHILLONG: Meghalaya aro Bangladesh a·songni sima jolrango songdongenggipa manderangko niam gri napsrukbaenggipa Bangladesh a·songni manderang chadrapna jotton ka·rongenga ine Narpuh constituency-ni gital MDC Deivipaya Tongper parakatenba, Bangladesh a·songni samba jolrango songdongenggipa manderangna chel·chakanirangko on·china Shillong-ni MP Ricky AJ Syngkon-na sedoataha.
Shillong-ni MP-na sedoatgipa chittio Voice of the People’s Party (VPP)-ni MDC Tongper-ni janapatani gitade, Bangladesh a·songni manderang niam gri, a·dokni sima jolrango donggipa dingtang dingtang songrang, mongsongbate Umkiang, Dona, Lum Soskie aro uandakgipa songrangona napdrabana jotton ka·rongenga aro ian songni manderangna kenchakna nanganiko ra·baengachim.
Re·anggipa February-ni 22 tarik pringwalni 2:00 bajimango, Bangladesh a·songoni sak 50 ba sak 60-mangni gita manderang, Umkiang jolrangona napdrabaaha aro songni manderangko chadrapna jotton ka·aha ineba MDC parakataha.
Iandakgipa a·selrang ong·engoba BSF sipairang maming ja·kurangko de·jaenga ine janapatengon, iandakgipa a·selrangko champengjagenchimode mikkangchiba obostarang namjabataona soknaba gnang ine Tongper, Shillong MP-na sedoatgipa chittio mikrakataniko on·angaha.
Indake ong·engon, a·song damgnini simarango ong·enggipa obostarangko ta·raken nirokatchina aro ia jolrango songdongenggipa manderangna tom·tomani aro chel·chakanirangko on·china Narpuh constituency-ni MDC, Shillong-ni MP Ricky AJ Syngkon-ko didiataha.
