SHILLONG: Gipin biaprangoni niam gri napsrukanirangko champengna gita Meghalaya a·doko rakgipa niamrang dongkujani gimin Khasi Hills jolrangona rel project ra·baaniko Khasi Hills Autonomous District Council (KHADC)-o Voice of the People’s Party (VPP)-chi chalaienggipa Executive Committee (EC) jegaldilani cholrang donga.
Iani bidingo kobor ra·timgipa manderang baksa agangrikengon, Khasi Hills jolrangona rel ramarangko taribana gita ma·mong sorkarini miksongenggipani bidingo VPP-chi chalaienggipa EC, name nichenggen ine KHADC-ni Chief Executive Membor (CEM) Shemborlang Rynjah parakataha.
“Rel project-rangni bidingo chinga maming ja·kurangko de·na skangba project-rangko name nichenggen,” ine Rynjah aganaha.
Council-o rel project-ni niamrangkoba uamang name nichenggen ineba ua aganaha.
Khasi Hills jolrangona rel garirangko ra·bana skangde a·dok sorkari, Khasi jatko naljoke rakkina gita bilakgipa niamrangko ra·gatchengna nanggen ineba KHADC-ni CEM aganaha.
Byrnihat-Shillong rel project-ko chu·sokatchipna man·jaengani giminan ia project-na a·a ra·na on·atgipa gong kror 270 tangkarangko on·atpilchina ma·mong sorkari, a·dok sorkarina ge·etaniko on·atahachim.
Ia project-na chamatgipa tangkarangko on·atpilchina ma·mong sorkarini seatgipa chittiko a·dok sorkari man·soaha ine adita salrangna skangsan a·dokni Chief Minister Conrad K Sangma parakataha.
Dingtang dingtang dolrang jegaltokengani a·selan Byrnihat-Shillong rel project, 2016-2017 bilsirangonin bon·chipengahachim ine nikna man·a.
A·dokona niam gri napsrukanirangna kenchakenba KSU aro uandakgipa dingtang dingtang dolrang, Khasi aro Jaintia Hills jolrangona rel rama taribaaniko raken jegalsotokengachim.
