SHILLONG: Garo Hills-oba Khasi Hills a·jao gita daken apsan namroro silroroaniko ra·bana man·na gita Tura-ko Winter Capital songchina dingtang dingtang dolrang dabitokengon, ia dabianiko nipilna gita a·dok sorkari, dingtangmancha committee-ko songna tik ka·angaha.
Tura-ko Winter Capital songchina dabienggipani bidingo Opposition dolni dilgipa Mukul Sangma, Bristibar salo chanchirimaniko Assembly-o a·bachengataha aro ia chanchirimanio Assembly-ni Deputy Speaker Timothy D Shira, Jim M Sangma, Celestine Lyngdoh, Renikton Lyngdoh, Rupa Marak, Brening Sangma, Limison Sangma aro Subir Marak-ko man·chape Assembly-ni dingtang dingtang membor-rangba bak ra·angaha.
Tura-ko Winter Capital songchina dabienggipani bidingo nipilna gita committee-ko songna ku·rachakaniko on·angani ja·man Mukul Sangma-ni ra·bagipa resolution-ko ra·pilahaoba, iako a·dokni Chief Minister Conrad K Sangma-ba mittele aganangaha.
“Assembly-o an·ching chanchirimengon, Rangsakona-ni MLA, committee-ko songna gita ku·pattianiko on·aha aro iani bidingo jera ra·grikani ja·man, Tura-ko Winter Capital songchina dabienggipani bidingo nipilna nangnikaniko bang·bata membor-rangan namnike ra·chaktokaha,” ine Chief Minister, Assembly-o parakataha.
Tura-ko Winter Capital songani bidingo chanchirimna committee-ko songanio political dolrang, civil society-ni membor-rang aro jatko dilenggiparangba bak ong·gen ineba Chief Minister parakataha.
Winter Capital-ko songani bidingo talataniko on·angengon, ian adita sal somoirangna minister-rang aro chief secretary-ko man·chape sorkarini executive wing-ko Tura-ona ra·angenba, Assembly session-rangko ong·atanian ong·gen ine Chief Minister parakataha.
Winter Capital songanio aditan korosrang ong·gen indiba pilak biaprangon apsan namroro silroroaniko on·ani aro sorkariko chalaianio pilakkon apsan man·gopanisa mongsongbatgipa bak ong·a ine Chief Minister parakataha.
“Iako an·ching korosmangmangni gitasan niatna nangjawa indiba pilakkon bak ong·ate, sorkarini kamrangko manderangona sokatani aro pilak biaprangkon tang·doatanikosa nina nangenga,” ine Sangma aganaha.
Tura-o rikenggipa gong kror 170-ni Integrated Administrative Complex-an sorkarini kamrangko manderangona sepangbatatani bak ong·gen ineba Chief Minister parakataha.
Tura-ko Winter Capital songchina dabienggipani bidingo Garo Hills-ni MLA-rang, ku·rang on·jaenga ine dingtang dingtang dolrang matnangtokengachim.
