TURA: Meghalaya Teachers Eligibility Test (MTET)-ko pass ka·e South Garo Hills a·jao assistant teacher-ni kamna dorgasto galgipa candidate-rangna ta·raken skigipani kamrangko on·china Garoland State Movement Committee (GSMC) didiataha.
Iani bidingo GSMC-ni co-chairman Jakrak A Sangma aro general secretary Tony Tojrang B Marak-ni dilanichi, GSMC-ni membor-rang, Baghmara-ni District Education Officer-na memorandum-koba on·angaha.
GSMC-ni parakatani gitade, Baghmara-o skigipani kamrangna 2023 bilsion advertisement-ko on·manahachim indiba da·alona kingkingan skigipani kamrango gapatkujaengani a·sel MTET pass ka·e dongenggipa candidate-rang neng·nikanirangko chagrongna nangtokengachim.
MTET pass ka·e dongenggipa candidate-rango kamo ra·napgija dongchaengani a·selan South Garo Hills a·jao lekka porako on·ani kamrang bilgrienga aro kamna senge dongenggipa candidate-rangnaba neng·nikani ong·enga ine janapatengon, MTET pass ka·e kamna senge dongenggipa candidate-rangna sal 15-ni gisepon skigipani kamrangko on·china GSMC dabiangaha.
Ia sal 15-ni gisepo uamangni dabiani gita kamrangko chu·sokatja ong·ode dongimin niamrango pangchake jingjengatanirangko dakna draatako man·gen ineba GSMC-ni membor-rang, mikrakataniko on·angaha.
