SHILLONG: Khasi aro Jaintia Hills a·jarango pangchakaniko songna man·ahani gimin da·o Voice of the People’s Party (VPP)-ko ka·sinsin Garo Hills-onaba ra·bana miksongenga ine Sukrobar salo, VPP-ni president Ardent Miller Basaiawmoit parakataha.
“Chinga tangka paisa grisa politics-ko a·bachengengani gimin changsanode a·dokni pilak biaprangon bikotna gita cholrang dongja indiba chinga Garo Hills-onaba ka·sinsin ramako tariangenga. Garo Hills-ni manderang ching baksa bakrimengani gimin chinga kusi ong·a,” ine Basaiawmoit aganaha.
Party-ko dal·batatanio chagrongna nangenggipa neng·nikanirangko janapatengon, VPP-ko uamang Meghalaya a·dokni pilak biaprangon niksenggipa ong·atna niksamsoanirang donga ine Basaiawmoit aganaha.
“Chinga badiaba biap ba jatnasan kamko ka·aigipa dol ong·ja indiba register ka·gimin a·dokni regional party-an ong·a aro chingni party-ko niksenggipa ong·atna chinga raken kamko ka·angkugen,” ineba VPP president parakataha.
Garo Hills-ni gitcham dilgiparang baksa VPP bakrimna miksonganirang dongama ine sing·anina aganchakaniko on·angengon, “Rongtalgipa politics-ni kamrangko angni a·bachengani somoio bang·a manderangan iako Nongkrem-ode cholijawa ine chanchitokachim indiba da·alo Khasi aro Jaintia Hills gimikon manderang ra·chaktokaha. Apsan daken Garo Hills-oba manderang dingtangniko nangnikenga aro uamangba namgipa sorkariko chalaina gitade rongtalgipa politics-ko nanga ine ma·sitokengaha,” ine Basaiawmoit aganaha.
2028 bilsini gisepode VPP, Garo Hills-o chu·gimik pangchakani dongkujanaba gnang indiba Garo Hills-ni mongsonggipa a·jarangon VPP-ko nikna man·gnok ineba VPP-ni president ku·rachakaniko on·angaha.
“Chinga a·dokni pilak a·jarangonan VPP-ko gipatna jotton ka·gen,” ine ua aganaha.
