TURA: West Garo Hills a·jani Pedaldoba jolrango mongma aro mandeni gisepo chagronggrikanirang ong·rongenganichi manderangni janggi aro gam-jinrang gimaatako man·rongna nangenga ine A·chik State People’s Front (ASPF) Pedaldoba sub-unit parakatenba, Pedaldoba-o Wildlife Protection Camp-ko songkamchina a·dokni Chief Minister Conrad K Sangma-ko didiataha.
ASPF Pedaldoba sub-unit-ni president Hilbath Sangma-ni u·iatani gitade, Pedaldoba jolrango mande aro mongmarangni gisepo chagronganirangko nikna man·rongenga aro iani a·selan manderangni janggi aro ma·manti gam-jinrang gimaatako man·na nangrongengachim.
“Mongmarang cha·anirangko sandie pangnan manderangni dongchakgipa biaprangona re·baronga aro uandaken manderangni nok-jamrang, bagan barirang aro ma·manti gam-jinrangko nisie galrongenga. Basakobarangde mongmarangni chadrapanichi manderangni gamchatbegipa janggirangba gimana gita nangenga,” ine Sangma parakatenba, ia jolrango iandake mande aro mongmarangni gisepo chagronggrikanichi janggi aro gam-jinrangni gimaaniko champengna gita Pedaldoba-o Wildlife Protection Camp-ko songe on·china Chief Minister-ko mol·molataha.
“Ia jolrango Wildlife Protection Camp-ko songe on·aniara manderangnasan naljokaniko on·ani ong·aijawa indiba mongmarangnaba naljokaniko on·na dakchakani ong·gen,” ine ASPF Pedaldoba sub-unit-ni president parakataha.
