RESUBELPARA: Resubelpara-ni New Kantolguri songo, Rajasthan a·dokni Ganshyam Bhora Charitable Foundation-na a·a register ka·aniko dontongchina dabie Rongrong constituency-ni MDC Rinaldo K Sangma, North Garo Hills a·jani Deputy Commissioner-na sedoataha.
Koborko on·ani gitade, Jaipur songjinmani Ganshyam Bhora Charitable Foundation, New Kantolguri songo bigha 455 ong·gipa a·arangko an·tangtangni bimingo segatna miksongengachim.
“Niamrangko ja·rikgija ia dol, Tribal-rangni dal·begipa a·ako an·tangtangni bimingo segatna miksongenga. Angni kobor man·soani gitade, ia kamna nanggipa No Objection Certificate (NOC)-ko uamang tol·gipa niamrangchisa GHADC-ni Chief Executive Membor (CEM)-oniko man·aha aro ian jatna jajrengna nangani ong·enga,” ine Deputy Commissioner-na sedoatgipa chittio MDC parakataha.
Jolni MDC ong·e una mamingkoba u·iatchenggija NOC-ko on·ahani giminba Sangma, GHADC-ni CEM-ko sing·doataha.
“Chingni daitode jolo songdongenggipa manderangni aro A·chikrangni bil aro cholrangko chel·chakanian ong·a. Ia nangchongmotgipa kamni bidingo ia dol, changsaba angona re·bae agangrikea ba sing·sandiaba dongja,” ine Sangma parakataha.
Indita a·arangko ia dolni bimingo segataniara Meghalaya Land Transfer Act-ni ning·o dongimin niamrangko pe·ani gita ong·e mikkangchi ia biapo songdongenggipa bi·sarangna kenchakna nangani ong·gen ineba Rongrong MDC parakataha.
“Angni report aro lekkarangko man·soani gitade, ia dolna NOC-ko on·anio maming parake dakani dongja aro niamrangkoba ja·rikjahani gimin maming ja·kurangko de·na skangba iarangni bidingo name sandirokchengna nanggen,” ine Sangma parakataha.
“Khasi Hills-ode a·dokni niamrangko manigija Meghalaya Industrial & Investment Promotion Scheme (MIIPS)-ko jegaltokengon, Garo Hills-ode a·paloni re·bagipa dolrangna name am·sandichenggija indita bighani a·arangko on·skaenga. Ian Tribal-rangna, mongsongbate A·chikrangna on·gimin bilko ra·sekani ong·chongmotenga,” ine Rongrong MDC parakataha.
Ia kamko dontongatchengenba, NOC-ko on·ani bidingo sandirokchina Deputy Commissioner-ko didiatengon, iani bidingo dingtang dingtang dolrang, songni Nokma, Chrarang aro Maharini gisepo apsan tom·e chanchirimchina gita didiataha.