East Jaintia Hills-o skanggipa Scientific Mining Coal Block-ko CM kulie on·anga

SHILLONG: A·doko skanggipa Scientific Mining Coal Block, chong·motan East Jaintia Hills a·jani Byndihati-o donggipa Saryngkham-A-o niam gita koela bikotaniko Sombar salo, a·dokni Chief Minister Conrad K Sangma, internet gita a·bachengate on·angaha.
Ia Scientific Mining Coal Block-ko do·ga ona gita dingtangmancha tom·bimonganiko Byndihati-o ong·atangaha aro ia tom·anio, a·dokni Cabinet Minister Kyrmen Shylla, Sutnga-Saipung-ni MLA Santa Mary Shylla, JHADC-ni Executive Membor Hambertus Nongtdu, East Jaintia Hills a·jani Deputy Commissioner Shivansh Awasthi, SP Giri Prasad aro jolo songdongenggipa manderangba bak ra·angtokaha.
Byndihati-o donggipa Saryngkham-A-o niam gita koela bikotaniko a·bachengna do·gako oe on·anganio a·dokni Chief Minister Conrad K Sangma, video conference gita jinmana aganprakatengon, a·doko ia skanggipa Scientific Mining Coal Block-ko kulie on·na man·ahani gimin dingtang dingtang official-rangko, koela a·kol nokgiparangko aro jolo songdongenggipa manderangko mittelpilangaha.
Batanggimin bilsi 10-11-ni gisepo a·doko niam gri koela bikotaniko champengatanichi koela bikotanio pangchake janggi tanggiparang namen neng·nikanirangko chagrongna nangtokaha ine janapatengon, 2018 bilsio uamang MDA sorkariko rikchengani somoion, a·doko koela bikotaniko a·bachengpiltaina kang·kare kae kam ka·aha aro batanggimin bilsidok bilsisnina rakbee kamrangko ka·ani a·sel da·alo ia skanggipa Scientific Mining Coal Block-ko kulina man·e biteko nikna man·engaha ine Sangma aganaha.
“An·chingni ia biteko man·na re·mikkanganirang altua ong·jaha aro niamo pangchake koela bikotaniko a·bachengna kam ka·anio an·ching dingtang dingtang ra·bianirangko chagrongna nangaha. Indiba manderangni neng·nikanirangko namatna skani dongahani gimin chinga ia kamko dontonggija jako ra·aha aro da·alo an·ching ia biteko ra·na man·aha,” ine Chief Minister aganaha.
A·dokni gipin koela a·damrango scientific mining-ko a·bachengna aro dorgasto galgipa gipin manderangna licence-rangko on·na gitaba da·o kamrangko ka·engaha ineba Sangma aganaha.
Pangnan kamrangko a·bachengani somoirangode neng·nikanirangko man·rongaia ine janapatengon, da·o skanggipa koela a·damko a·bachengna man·engahani gimin gipin biaprango koela bikotanikoba ta·raken a·bachengna man·aignok aro kamrang altubatangaignok ine Chief Minister aganaha.