TURA: West Garo Hills a·jani a·kawe jolrango, Assam aro gipin biaprangoni re·napbae songdong a·chaenggipa gipin jatrangna a·doko dongimin niamrangko pe·e a·arangko palenga ine Garo Hills-ni Constitutional Rights Forum (CRF), Garo Hills Autonomous District Council (GHADC) aro bilo ong·enggipa gipin dilgiparangna badi ka·doangaha.
Iani bidingo GHADC-ni Deputy Chief Executive Membor (CEM) aro Land & Revenue-ni In-charge-na badi ka·e sedoatengon, West Garo Hills a·jani Babilgre A·kingni ning·o donggipa Balujhora, Wadagokgre, Phulbari aro Rajabala jolrango, gipin jatrangna niam gri a·arangko pale cha·enga aro kamrangko ka·e cha·na on·enga ine CRF matnangataha.
“Non-Tribal-rang IC card-rang aro gipin lekkarangko tarie Assam-oni Meghalaya a·dokona napsrukbana man·enga ine chinga koborrangko man·soaha. Uni gimin iani bidingo sandirokchina aro mikkangchi ia jolrango iandake niam gri songdong a·chaanirangko champengna gita ja·kurangko de·china chinga didienga,” ine CRF-ni dilgiparang parakataha.
CRF-ni parakatani gitade, bilo ong·enggipa manderangni permission gride Meghalaya Transfer of Land Regulation Act 1971-ni ning·o, gipin jatrangna a·a palaniko champengani dongachim indiba ia jolrango, ia niamko pe·e skatang a·arangko gipin jatrangna paltokenga.
“Indian Constitution-ni Sixth Schedule-an Tribal-rangni a·arang aro bilrangko warachakgipa ong·a, uni gimin ia jolrango gipin jatrangni man·e dongenggipa ID card-rang aro gipin lekkarangko name nipilchina chinga didienga,” ine GHADC-ni Deputy CEM-na sedoatgipa chittio CRF parakataha.
Mikkangchi Tribal-rangni a·arangko Tribal ong·gijagipa manderangna palaniko champengna gita rakgipa ja·kurangko de·china gitaba CRF didiataha.
