SHILLONG: National People’s Party (NPP)-chi dilenggipa Meghalaya Democratic Alliance (MDA) 2.0 sorkariko chalaiani da·o bilsigni ata gapna siengahaoba, Cabinet-ko sualpiltaiani bidingo, mongsongbate BJP-ni MLA sakgnini gisepo biapko te·sreani bidingo name ma·sikujaenga.
Iani bidingo kobor ra·timgipa manderang baksa agangrikengon, Cabinet-ni biapko te·sreani bidingo jekon BJP-ni dilgiparang tik ka·genchim, ua an·tangde ukon ra·chakna kusi ong·aigen ine BJP-ni dilgipa aro MDA sorkario Minister ong·enggipa AL Hek parakataha.
“Na·simang iako state president-osa sing·na nanggen. Anga an·tangde jeko party-ni dilgiparang tik ka·a, ukon ra·chakna kusi ong·aigen,” ine Hek aganaha.
Meghalaya a·doko BJP-ni MLA sakgni donga indiba da·o dipet Conrad Sangma-chi dilenggipa MDA sorkario, Pynthorumkhrah-ni BJP MLA AL Hek-san cabinet minister ong·e kamko ka·engachim. BJP-ni sakgipin MLA Sanbor Shullai-ba Cabinet-o biapko man·piltaina ka·dongengachim.
2023 bilsio MDA 2.0 sorkariko rikchengani somoion, Cabinet-ni biapko BJP MLA sakgni, bilsigni ata ka·e sualgrikna tik ka·gimin donga ine Shullai-ba Cabinet-o biapko man·na ka·dongskaengachim.
BJP MLA sakgnini gisepo, Cabinet-ni biapko sualgrike ra·na gita chanchia dongama dongkuja ine sing·anina aganchakaniko on·angengon, Cabinet-ni biapko te·srena gita ma·mongoni maming ge·etaniba dongkuja aro iani bidingo chanchiaba dongkuja ine BJP-ni kobor on·timgiparang parakatskaahachim.
Kobor on·timgiparangni parakatani gitade, 2023 bilsio MDA 2.0 sorkariko rikchengani somoio BJP-ni MLA AL Hek-ko minister songchinasa BJP-ni national president JP Nadda, Meghalaya a·doko BJP-ni dilgiparangna u·iataniko on·ataiaha indiba badita bilsina uko minister songna nanga uni giminde mamingkoba u·iatjahachim.
Kobor on·timgiparangni aganani gitade, BJP MLA sakgnini gisepo Cabinet-ni biap damsako sualgrikna songgigrikani donggenchimoba ian a·dokni BJP-ko dilenggiparangni nangnikanisan ong·aia maina ma·mongni dilgiparangde iani bidingo maming u·iata dongkujachim.
Iani bidingo sing·anina aganchakaniko on·angskaengon, “Ia pilakan manderangni skaniosa ong·aia indiba BJP-ni on·kange kam ka·aniko manderang gisik ra·chongmotgen,” ine Hek aganaha.