SHILLONG: Meghalaya a·dokona niam gri napsrukanirangko champengna gita Inner Line Permit (ILP)-ko ra·gatchenggijade Khasi aro Jaintia Hills a·jarangona rel garirangko ra·bana man·jawa ine Bristibar salo Khasi Students Union (KSU), sorkarina gisik ra·atpiltaianiko on·angaha.
KSU-ni bilsi 47 gapaniko manianio jinmana aganprakangengon, “Chinga ru·uta bilsirangonin ILP-ko ra·gatchina dabiengon sorkari, rel ramarangkosa tarina proposal-rangkosa on·skaenga. Uni gimin chinga Khasi jatko chel·chakna gita bilakgipa niamrangko ra·gatchina nangnikenga aro chingni nangnikaniko manigija rel ramarangko taridrana jotton ka·genchimode chinga pattoko napnaba kenjawa,” ine KSU-ni president Lambokstarwell Marngar mikrakataniko on·angaha.
ILP-ko ra·gatchina dabina gita a·dok sorkari resolution-kode pass ka·manahachim indiba da·alonan iani bidingo ma·mong sorkari maming aganchakanirangko on·kujaenga ineba KSU president aganaha.
Meghalaya Residents Safety & Security Act (MRSSA) 2016-ko a·doko ra·gatkujaengani giminba sorkariko matnangatengon, “Khasi jatko chel·chakna gita KSU maiko dakjok ukosa manderang sing·na nangja indiba manderangni seoke watatgipa MLA-rang, iani bidingo maiko dakaha ukoba sing·na nanga. Ia MLA-rangko Tribal jatko chel·chakna gita niamrangko tarichinasa manderang seoke watatahachim,” ine Marngar aganaha.
KSU-ni bilsi 47 gapanio uamang Tribal-rangni namgnina dingtang dingtang kamrangko jako ra·e ka·aha ineba Marngar parakataha.
Batanggimin bilsirango a·dok aro ma·mong sorkarirang, KSU-ko bak dakna jotton ka·ahachim ineba ua aganaha.
“2007-2009 bilsirango sorkari, rong·mesakni bidingo KSU-ko bak dakna jotton ka·aha aro dilgiparangni janggirangko ra·naba jotton ka·aha. Indiba KSU-ni dilgiparang batanggimin bilsi 47-na Tribal-rangko chel·chakna kam ka·aha aro mikkangchiba ka·angkugen,” ine KSU president, ku·rachakaniko on·angaha.
