SHILLONG: 2023-2024 Academic Session-ni Scheduled Tribe (ST) chatro chatrirangna Umbrella Scheme-ni ning·o ra·gatgipa Post Matric Scholarship-na gong kror 85.0779 ong·gipa ma·mong sorkarini bon·kamgipa instalment-ko ma·mong sorkari watatmanaha aro bakan a·dokni chatro chatrirang, an·tangtangni scholarship-rangko man·gnok ine Sukrobar salo, a·dokni Chief Minister Conrad K Sangma parakataha.
2023-24 bilsini scholarship-rangko chatro chatrirang man·tokkujaengani gimin batanggimin somoirango dingtang dingtang dolrangni matnanganirangko aro sorkarina badi ka·e sedoanirangko bang·en nikna man·engachim.
Indake ong·engon, ia scholarship-ni bon·kamgipa instalment-ko ma·mong sorkari, a·dokna watatmanaha aro bakan chatro chatrirang, an·tangtangni man·na nangenggipa scholarship-rangko man·tokgnok ine Chief Minister parakataha.
Scholarship-rangko on·ani bidingo janapatengon, ia scheme-ni ning·o gimik sak 76,755 chatro chatrirang, scholarship-na dorgastoko galaha aro ia scholarship-ni gong kror 42.32 ong·gipa skanggipa instalment-kode 2024 bilsini June 24 tarikon ma·mong sorkari watatahani gimin sak 17,364 chatro chatrirangde scholarship-rangko man·tokaha ine Chief Minister parakataha.
Gong kror 66.67-ni gnigipa instalment-koba ma·mong sorkari, 2024 bilsini November 20 tarikon watatahani gimin sak 32,064 chatro chatrirang, scholarship-rangko man·tokaha ine janapatengon, da·alo gong kror 85.0779-ni bon·kamgipa instalment-koba ma·mong sorkari watatahani gimin bangki dongkuenggipa chatro chatrirangba bakan an·tangtangni scholarship-rangko man·tokgnok ine Sangma parakataha.
Salsa salgnini gisepon ia scholarship-ni tangka paisarangko chatro chatrirangni bank account-rango chipatgnok ineba Chief Minister parakataha.
