TURA: Garo Hills-ni manderang, High Court-ni kamrangna re·ruraanirango neng·nikanirangko chagrongna nangtokenga ine Constitutional Rights Forum (CRF) parakatenba, Meghalaya High Court bench-ko Tura-oba kulichina didie, a·dokni Chief Minister Conrad K Sangma-na sedoataha.
CRF-ni parakatani gitade, da·o dipet Meghalaya High Court-ni bench, a·dokni skotong Shillong songjinmaosa ong·kuengani gimin Garo Hills-ni manderang High Court-ni kamrangna pangnan Shillong-onasa re·rurana nangtokenga aro re·ruraanirango tangka paisa baksana somoirangko galna nange bang·a manderangan neng·nikanirangko chagrongna nangtokenga.
RTI ka·e man·ani gitade, bilsiantian Garo Hills-ni dambonga a·jarango ming 1250-oni ming 1500 case-rangko Meghalaya High Court, register ka·enga ine janapatengon, “Bilsio indita case-rang High Court-o ong·engani gimin Garo Hills-ni bang·a manderangan, an·tangtangni case-rangna Shillong-onasa re·angna nangtokengani a·sel neng·nikanirangko chagrongna nangtokenga. Uni gimin manderangni somoi aro korosrangko komiatna gita Tura-oba High Court bench-ko kulina nangchongmotenga,” ine CRF parakataha.
Meghalaya a·dokko man·chengaoni Garo Hills Bar-ni ukil saksakoba High Court-ni Judge-na seoka dongkuja ineba CRF, suk ong·gijaniko parakataha.
