TURA: Tura songjinmani Babupara jolo donggipa Garo Labour Corps-ni Cenotaph-ko gital dake tarina Tura Municipal Board aro District Administration-ni pe·e galahani gimin a·dokni Congress dolba raken jegalataha aro ian a·gilsak gimikni dakgrikanio an·tangtangko on·kange France a·songona re·anggipa A·chik pagitchamrangko aro uamangni nokdangrangko mande ra·gija mesokani gita ong·aha ine matnangataha.
Ia a·selni bidingo koborko man·soenba Sukrobar salo, All India Congress Committee (AICC)-ni Joint Secretary I/c Mathew Antony, Congress dolni gipin dilgiparang baksa Tura-ona re·baaha aro pe·e galgipa Cenotaph-ona re·ange, A·chik matgrikrang aro uamangni nokdangrango kemako bi·aha.
Ia biapona re·ange kema bi·anio, Congress dolni working president Deborah C Marak, Meghalaya Pradesh Youth Congress (MPYC)-ni president Timjim Momin, Youth Congress-ni Meghalaya in-charge Madam Sarifa, gitcham MLA Ferline CA Sangma, gitcham MLA Brigady N Marak aro gipin dilgiparangba dongpaaha.
Ia Cenotaph-ko pe·e galanio jak donggipa West Garo Hills a·jani Deputy Commissioner Jagdish Chelani aro Tura Municipal Board-ni official-rangko ta·raken kamoniko ra·galchina gitaba Congress dol dabiangaha.
Indake ong·engon, ia Cenotaph-ko pe·e galanina jegaldilenggipa Mothers Union aro dingtang dingtang dolrangna Tura-ni MP aro Congress dolni dilgipa Saleng A Sangma-ba bakrimpaaniko parakataha.
