ADOKGRE: North Garo Hills a·jani Adokgre jolo donggipa Badaka dolongko rika matchotkujaengani a·sel songni nokni manderang re·ruraanirango neng·nikanirangko chagrongna nangtokenga ine A·chik Holistic Awakening Movement (AHAM) Adokgre regional unit parakatenba, ia dolongko ta·rake matchotna gita kamrangko nirokatchina ine a·dokni Chief Minister Conrad K Sangma-na sedoataha.
AHAM Adokgre regional unit-ni u·iatani gitade, ia dolongara Ildek chibimani paktangtango donggipa songrangko nangdimeategipa dolong ong·achim aro ia dolongko rikani da·onan matchotchipkujaengani gimin ia chibimako batsotna gita manderang bolni dolongkosa jakkalkuenga.
Ia dolongara, Kharkutta-Dilma Adap aro Adokgre ramako nangdimatgipa dolongba ong·ani gimin ian bang·a songrangnan nangchongmotgipa ong·a ineba AHAM Adokgre regional unit parakataha.
Ia dolongni bidingo AHAM regional unit-ni gita RTI ka·e am·sandion, ia dolongko rikna 2018 bilsini January jaon sanction ka·e, bilsignini gisepon matchotna gita somoiko donmanahachim ine ma·sina man·aha.
“Ia dolongko rikna gong 17,59,91,985 tangkarangko chamaha aro ianoni gong 9,99,55,018 tangkarangkode ia dolongko rikgipa contractor G Harlalka okmanaha. RTI report-o parakani gitade, ia dolongko 2019 bilsini November jaosa rikna a·bachengaha aro kamrang 25 percent-ni gitasan matchotkuenga. Kam matchotaniko nigenchimode ia contractor-ni tangka okani nangana batangpilaha aro ian tangka jakkalsretaniko mesokani ong·a,” ine AHAM Adokgre regional unit, Chief Minister-na badi ka·e sedoatgipa chittio parakataha.
Indake ong·engon, ia dolongko ta·rake matchotna man·na gita ia project-ni bidingo inquiry-ko dakatchina aro kamrangko ka·anio maiba ong·gija dakanirang donggenchimode contractor-ni kosako rakgipa ja·kurangko de·china gita AHAM Adokgre regional unit, a·dokni Chief Minister-ko didiataha.
