TURA: Batanggimin bilsibri ong·na sipile North Eastern Hill University (NEHU) Tura Campus-ko Director-in-Charge-ni ning·osa chalaie dingtang dingtang neng·nikanirangko chagrongna nangahaoba da·o Dr Fameline K Marak-ko Tura Campus-ni Pro-Vice Chancellor (PVC) songahani gimin dingtanganiko nikna man·gnok ine NEHU Tura Campus-ni Post Graduate Students Union (PGSU), mittelpilaniko parakataha.
PGSU-ni president Chakram D Sangma-ni parakatani gitade, Tura Campus-ko chalaina gita Director-in-Charge donggenchimoba uni daitorango chu·gimik bilrang dongjani a·selo Campus-ko name nirok sandina aro chalaina gita man·jae neng·nikanirangko chagrongna nangengachim indiba da·o Tura Campus-na PVC-ko songahani gimin Campus-ko chalaianiosan ong·aigija chatro chatrirangna lekka porako on·anio aro dingtang dingtang kamrangkoba nambate ka·na man·gnok.
“Da·o NEHU Tura Campus-na Professor Dr Fameline K Marak-ko Pro-Vice Chancellor songahani gimin University-ni mongsonggipa kamrango saksa dilgipani kamko ka·na man·gnok. Headquarter-ni gadango PVC-ba university committee-ni membor ong·e, Campus-ni nanganirangna ku·rang on·na man·gnok aro ru·uta bilsirangna champengatako man·enggipa kamrango dingtanganiko ra·bana man·gnok,” ine PGSU-ni president parakataha.
NEHU Tura Campus, Garo Hills-o batanggimin bilsi 29-na a·gilsakni seng·aniko on·anio mongsonggipa centre gita ong·engoba dingtang dingtang neng·nikanirangko chagrongna nangkuenga ine janapatengon, Tura Campus-o nokrang chu·ongjae, hostel-rang namjae, kam ka·giparang chu·ongjae aro lab-ni bosturang chu·ongjae neng·nikanirangko chagrongna nangkuenga ine PGSU parakataha.
“Indiba da·alo NEHU Tura Campus-na gital PVC-ko man·ahani gimin chinga ia Campus-o namroro silroroaniko aro dingtanganiko nikna ka·dongenga aro Tura Campus-ni namroro silroroanina chinga gital PVC baksa bakrime kamrangko ka·anggen,” ine PGSU-ni president parakataha.
NEHU Tura Campus-ni gital PVC-na PGSU, namgipa skanirangkoba on·ataha.
