SHILLONG: Drugs ba pekatgipa samrangko warachakaniara sorkarini daitosan ong·ja indiba songsalni daitoba ong·a ine a·doko iandakgipa pekatgipa sam jakkalanirangko warachakanio a·doko songdongenggipa dingtang dingtang jatrangkoba bakrimchina a·dokni Social Welfare Minister Paul Lyngdoh didiataha.
Meghalaya aro Arunachal Pradesh a·dokni doctor-rangna Shillong songjinmani SANKER-o ong·atanggipa Addiction Medicine-ni Training program-o ua jinmana aganprakengon, pekatgipa sam jakkalaniko warachakanio a·dok sorkarini gita chu·gimik dakchakanirangko on·gen ine Lyngdoh, ku·rachakaniko on·angaha.
A·dok sorkarini ra·gatgipa Drug Reduction, Elimination & Action Mission (DREAM) program-ni bidingo janapangengon, ian sam jakkalgipa manderangko sanna aro songsalona rimbapilna ra·gatgipa program ong·a ine Minister aganaha.
Ia dakgrikanio sorkari saksande chena man·jawa aro songsalni manderangba bakrimaniko on·na nanggen ineba ua aganaha.
“Sam jakkalgipa manderangko bang·a manderangan mitchitoka indiba dingtanganiko ra·bana nangnikenga ong·ode ia chanchianiko dingtangatchengna nanggen,” ine ua aganaha.
Pekatgipa sam jakkalaniko kenatachide champengna man·jawa ine janapatengon, sam jakkale watna man·gija dongenggipa manderangko simsak nirokna aro ka·sae dangdike on·na nangani gimin Social Welfare Minister aganangaha.
