Tura: West Garo Hill a·jani Dalu Block-ni ning·o ga·akgipa Sesengpara songo Bandra chibimako bolchi kasotgipa gitcham dolongko batanggimin 2022 bilsio mikka jimbee wani a·sel chi bana re·anichi dolongko man·pakangani gimin Bandra Chibima paksagrik donggipa man-derangna neng·nikaniko man·engachim, unigimin uamangni neng·nikaniko komiatna World Bank-ni tangkachi gital riktaie on·-gipa Suspension dolongko Chief Minister Conrad K Sangma sukrobar salo oprake on·angaha.
Chief Minister Conrad K Sangma gital rikgipa sus-pension dolongko oprake on·ani somaio jinmana aganangengon, ia gital suspension dolong gitalko rikna gita World Bank 2.08 crore tangkarangko chamaha, ia dolongni bakroanian 80 meter ong·a aro ia dolongan Sesengpara, Kherapara-oni Dombagre songona dakanggipa ong·a da·ode sak 2,000 baten manderang ia gital dolongni namgniko man·gnok aro KM 11 ong·gipa ramako re·aniko ia dolongan komiatgnok ine Sangma aganangaha
