SHILLONG: Meghalaya a·doko niam gri koela bikotenga aro salruraenga ine matnanganirangko sandirokna gita songe on·gipa committee-ni sandirokanio, iandakgipa matnanganirangna sakkirangko man·enga ine ia committee-ko dilenggipa BJP-ni state vice president aro Tura-ni MDC Bernard N Marak a·kangataha.
“Niam gri koelarangko bikotenga aro iako jegalna man·jawa. Niam gri koela salruraanirangkoba bang·en nikna man·enga. Chingni am·sandie man·ani gitade, koelarangko Shalang-Athiabari rama gita Assam-ona salangenga. Ia rama gitan bang·bea koelarangko salrurana jakkalenga,” ine Marak aganaha.
Iani bidingo chu·gimikko parakna gita jechakangkuengon, uamangni report-ko bilakgipa ong·atna uamang iarangni bidingo name nipilengkua aro pilakkon see rakkienga ine Marak parakataha.
East Jaintia Hills a·ja gita dakgipa koela a·damrangni bidingo sing·on, koela bikotgipa pilak a·jarangonikon uamang report-rangko tarienga ine BJP-ni state vice president parakataha. A·dokni bang·a biaprangon niam gri koelarangko bikotenga aro salruraenga ineba ua aganaha.
Marak-ni aganani gitade, ia committee-ni report-ko tariani matchotangengaha aro ia antini gisepon BJP-ni state president-na on·anggnok.
“Chinga report-ko tariengaha aro chingni sandie man·gimin pilakkon chimongaha. Sombar salo chinga report-ko matchotatgnok aro Mongolbar salode state president-na on·anggnok,” ine ua aganaha.
A·doko niam gri koela bikotani aro salruraanirangko am·sandie report on·china gita sal 40 somoiko ia committee-na on·chengahachim indiba ja·mano ia committee, antigni somoiko bi·dapskaahachim.
Marak-ni aganani gitade, niam gri koela bikotani aro salruraaniko am·sandianio, dingtang dingtang NGO-rangkoba sing·sandina aro koela a·damrangona re·e sandina nangahachim.
Matchote tarigimin report-ko skanggipa a·dokni BJP-na on·chenggen aro niamo pangchake ja·mano ia report-ko Delhi-o donggipa BJP-ni dilgiparangna on·atgen ineba Marak parakataha.
