Bernard, Tura World War I Cenotaph-ko rikpiltaiani kamko nirokatchina PM-ko mol·molata

SHILLONG: State BJP-ni vice president aro Tura MDC, Bernard N Marak, Prime Minister Narendra Modi-ko mejaomangmang pe·galgipa Tura World War I Cenotaph-ko rikpiltaichina aro A·chik jatni heritage-ko ripingangna nirokatchina mol·molataha.
Prime Minister-na seatgipa chittio Bernard  Marak, gitchambegipa memorial-ko pe·galani gimin suk ong·gijaniko janapataha. World War I Cenotaph-ko World War I ba dakgrikao bak ra·gipa Labour Corps-ni A·chik matgrikrangko gisik ra·na rikgipa memorial ong·a.
Mejaomangmang Prime Minister-ni France Marseille-o Mazargues War Cementry-o sianggipa India-ni sipairangko mande ra·aniko janapate Bernard Marak, indine seataha, “France-o World War I-o dakgrikanio bak ra·gipa India-ni sipairangko gisik ra·e mande ra·aniko dakanina anga kusi ong·a, ua nang·ni bewalara sianggipa sipairangna dal·bea rasongni ong·a. Apsan daken British-ni chasongo bak ra·gipa A·chik matgrikrangni cementry Garo Hills-o donga, jekon pe·gale galaha.”
Garo Labour Corps-ni dakgrikanio bak ra·ani gamchataniko Marak, janapataha. Labour Corps-o Garo Hills-oni dingtang dingtang songrangoni bak ra·aha. 69th aro 84th Garo Labour Companies, British-na dakchakanio bilongen neng·nikarangko chagrongaha. Uamangoni bang·an re·bapiljaha, uamangko gisik ra·na Tura-o Cenotaph-ko songahachim.
Indake Bernard, adita sak matgrikrangni bimingrangko mingataha, uarangara—Najok Sangma, Manding Marak, Chakrang Marak, Jingja Sangma, Khey Marak, Rachan Sangma, Thorin Sangma, Tilok Sangma, Bangsila Sangma, Mongjan Sangma, Monsi Momin, Mohan Marak, Join Marak, Jinna Sangma, Thejan Marak, Ringisa Sangma, Aiding Sangma, Simon Sangma.”
Marak-ni aganani gita, Tura Municipal Board (TMB), Constitution-ni Article 243ZC-ni niamko pe·aha, urban development-ni bimingo cenotaph-ko pe·galaha. Sixth Scheduled area-ni ning·o chalaigipa Tura Municipal Board (TMB), Constitution-ni niamko  aro West Garo Hills District Administration-ni niamko pe·aha.
Minggipin je biapon cenotaph-ko rikachim, ua biapra Danakgre-ni tribal Nokma-ni biapsa ong·a, pe·na skang Nokma-o sing·sandie ra·a dongja.
Uandake UNESCO Convention for the Protection of the World Cultural and Natural Heritage-ko janapate, Marak, Garo jatni heritage-ko ripingna mol·molataha.
“Cenotaph-ko pe·galanina A·chikrang bilongen duk man·aha. Chingni itihasko bon·ataniara jolna jajrenganisan ong·aija indiba a·songnaba gimaani ong·a. Uni gimin Marak, Prime Minister, ia mamlako nirokatchina mol·molate, Tura World War I Cenotaph-ko apsan biapon rikpiltaina ge·etaniko on·china mol·molataha. Indake PM Modi-ni dilanio, ua Tura-ni mamlako ta·raken niatgen ine ka·donganiko parakaha.