TURA: Ia 2025 bilsini Secondary School Leaving Certificate (SSLC) porikkao pass ka·gipa chatro chatrirang, jemangan Tura Government College (TGC)-ni Class XI (Science, Commerce aro Arts stream)-o poraina cholrangko ra·engachim, uamangna Sombar salo form aro prospectus-rang chu·ongjahani gimin April 10 tarikoni form aro prospectus-rangko on·piltaigen ine kobor on·aha.
SSLC porikkani result-rangko re·anggipa Sonibar salo parakatani ja·man, porikkao pass ka·gipa hajalni hajal chatro chatrirang, Sombar salo Tura Govt College-o napna form-rangko ra·etokaha indiba indita sak chatro chatrirangna form aro prospectus-rang chu·ongjahani gimin form-rangko April 10 tarik Bristibar saloni on·piltaina tik ka·angaha ine u·iataha.
Ia chang MBOSE-ni SSLC porikkako seanio pass percentage 87.1 percent gapaha aro uandaken batanggimin bilsirangona bate result-rang namkalbatahachim ine nikna man·a.
Ia chang SSLC porikkako pass ka·gipa chatro chatrirang bang·batahani gimin higher secondary aro college-rango biaprang chu·ongjana gita sorkari kenchaksoskaengachim.
SSLC porikkako pass ka·gipa chatro chatrirang gimiknan admission-rangko on·na man·na gita a·dokni pilak sorkari secondary skulrangkoba higher secondary skulni gadangona ra·doatna sorkari tik ka·angaha aro higher secondary section-ko kulina sikenggipa private secondary skulrangnaba sorkari, No Objection Certificate (NOC)-rangko on·na tik ka·angaha.
