TURA: Garo Hills Autonomous District Council (GHADC)-ni election aro dingtang dingtang kamrango Tribal ong·gijagipa manderang aro gipin jatko kimgipa A·chik me·chikni dedrangrangba bak ra·pana man·jana gita dingtang electoral roll-ko tarina nangchongmotenga ine New Tura Development Forum (NTDF), GHADC-o dabiangaha.
NTDF-ni general secretary LC Momin-ni parakatani gitade, A·chikrangna on·gimin bilrangko chel·chakna gitasa Indian Constitution-ni Sixth Schedule ning·o Article 244 (2) aro 275-ni Paragraph 20-o dingtangmancha Autonomous District Council (ADC)-ko on·ahachim indiba batanggimin bilsi 73-na GHADC-ni election aro dingtang dingtang kamrango Tribal ong·gijagipa manderangba bak ra·na man·engkuachim.
“Uni gimin re·baenggipa bilsio ong·atna sienggipa GHADC election-na skangan ia niamrangko ja·rike, Tribal ong·gijagipa manderang aro gipin jatko kimgipa A·chik me·chikrangni dedrangrangba bak ra·pana man·jana gita dingtang electoral roll-ko tarichina chinga mol·molenga,” ine NTDF-ni general secretary, GHADC-ni Chief Executive Membor (CEM)-na sedoatgipa chittio parakataha.
Da·alona kingkingan GHADC-ni election-rango, gipin jatrangko man·chapgipa Assembly election-ni apsan electoral roll-rangko jakkalengkua ine janapatengon, “Indian Constitution-ni Article 244 (2) aro 275-ni Paragraph 20-o gipin jatrangni ADC election-o bak ra·aniko champenggimin dongachim aro ia niamara, salgro salaramni Assam, Meghalaya, Mizoram aro Tripura a·dokrangna nangchakeani dongachim. Ia niamrang dongani giminsa Khasi aro Jaintia a·jarangko man·chape pilak ADC election-rangon gipin jatrangko bak ra·pana gita on·jaenga indiba Garo Hills-ode 1952 bilsionin gipin jatrangkoba bak ra·na on·kuenga,” ine NTDF parakataha.
Indian Constitution-ni Sixth Schedule ning·o on·gimin niamrangko ja·rikjaengani giminsa GHADC election-rango Tribal ong·gijagipa manderang aro gipin jatrangko bia ka·gimin A·chik me·chikrangni dedrangba bak ra·na cholrangko man·enga ine janapatengon, mikkangchi GHADC election-rango aro GHADC-ni pilak kamrangon gipin jatrang bak ra·pana man·jana gita Indian Constitution-ni Article 244 (2) aro 275-ni Paragraph 20-o on·gimin niamrangko ja·rikna nanga aro GHADC election-o dingtang electoral roll-ko jakkalna nanga ine NTDF dabiangaha.
