TURA: Sorkarini dingtang dingtang scheme aro kamrangna Aadhar link ka·na nangengani gimin Budbar salo, Shillong songjinmao jegale jingjengatenggipa manderangko police-rangni bil jakkale champengahani gimin sorkari aro police-rangni kamko Garo Hills-ni Constitutional Rights Forum (CRF) raken jegalataha.
Sorkarini dingtang dingtang scheme-rangko ra·na aro dingtang dingtang kamrangna Aadhar-ko nangtelgipa ong·atengani gimin re·anggipa Budbar salo, Awakening India Movement (AIM) Meghalaya unit-ni membor-rang, jinma tom·bimonge re·jomaniko ong·atahachim aro uamangni Secretariat-ona re·jomangengmitingo police-rang, ia manderangko champengsoenba, uamangoni mitamko rim·ahachim.
Iandake jegalenggipa manderangni kosako bil jakkale champengahani gimin police-rangni kamko jegalatengon, ian a·songo songdongenggipa manderangna on·gimin bilko champengani gitasa ong·aha ine CRF parakataha.
“Indian Constitution-ni Article 19-o pangchake a·songni manderang, jinma tom·bimongna aro ku·rang on·na bil donga ine chinga bebera·a. Indake ong·genchimoba Budbar salo, manderangni tom·tome jegalaniko police-rangni bil jakkale champenganiara a·songo on·gimin bilko pe·ani gita ong·aha,” ine CRF parakataha.
“A·songo songdongenggipa manderang tom·tome jegalanirangko dakna bilrang donga aro iandake tom·tome jegalanikode Constitution-ni niamrango aro BNSS-oba niamni a·palo ine chanja. Uni gimin jegalenggipa manderangni kosako police-rangni bil jakkale champenganiko chinga raken jegala aro iani bidingo inquiry-ko dakchina dabienga,” ine CRF parakataha.
