TURA: Ia sal somoirango Tura jillao, mongsongbate Municipality area-o skatang jabol galaniko champengna gita Tura Municipal Board (TMB)-ni manderang, an·tangtangan jabol salgipa garirango gittim ge·antionan re·ange jabolrangko chimonge galengoba da·onan mitam biaprango, mongsongbate Lower Babupara, Brahminpara, Rishipara aro uandakgipa biaprango songdongenggipa manderang, jabolrangko chimonge galgija, a·dramrango aro chiringrangosa galskaengani gimin TMB-ni Chief Executive Officer (CEO), mikrakataniko on·ataha.
Tura jillao, Sombar saloni Sonibar salona kingkingan TMB-ni manderang, pring aro attamo changgni dake pilak gittimrangonan re·ange jabolrangko chimongenga aro manderang, TMB-ni gariko nisoe an·tangtangni chimongsogimin jabolrangko gario on·atnasan nangaiachim.
Tura Bazar jolrangko man·chape, Brahminpara, Rishipara aro uandakgipa biaprango da·onan jabolrangko chiringrangosa galengkuani gimin kobor ra·timgiparang, TMB-ni CEO-na re·ange sing·sandion, ia jolrango songdongenggipa manderangkoba apsan daken, jabolrangko chimonge TMB-ni garirango on·atchina u·iatmanahachim indiba ia jolrango songdongenggipa manderang, adita salrangnasan ia niamko ja·rike, skango gitan jabolrangko skatang galtaina a·bachengaha ine parakataha.
“Beben, mitam nokrangde ramarangoni chel·ani gimin jabolrangko ramaona ra·bae TMB-ni garirango on·atna neng·nikanirangko man·enggen indiba chinga salo changgni dake jabolrangko chimongengani gimin pringo man·jaoba attamo ra·bae TMB-ni garirango on·atna man·gen. Chiring sambarango donggipa manderangkoba chinga skangonin jabolrangko chiringrango galjachina u·iatahachim aro Tura jillani bang·bata biaprangon ia niamko ja·riktokengahani gimin da·o dingtanganikode nikna man·engaha indiba badiaba badiaba biaprango ia niamrangko ja·rikkugijagiparangba dongenga, uni gimin sakantikon ching baksa bakrimchina anga didina ska,” ine TMB-ni CEO Rikse R Marak parakataha.
Joltangtang aro gittimtangtango jinma rongtal an·talatanirangko dakjringchina gitaba Tura jillani dingtang dingtang gittimrango songdongenggipa manderangko TMB-ni CEO mol·molataha.
