SHILLONG: Gipin a·dokrango pangchakna nanggija a·doktangon wak be·enrangko chu·onga gita man·na miksonganio a·dok sorkari, wak jilenggipa manderangna dakchakanirangko on·enga ine Mongolbar salo, a·dokni Animal Husbandry & Veterinary (AH&V) Minister AL Hek parakataha.
Iani bidingo kobor ra·timgipa manderang baksa agangrikengon, a·doko wak jilenggipa manderangna a·dok sorkari, Meghalaya Piggery Mission aro ma·mong sorkarini National Livestock Mission-ni ning·o pilak nanga dakchakanirangko on·enga ine Hek parakataha.
Wak jilenggipa manderangna sorkarini scheme-rangko sokatna rakbee kamrangko ka·enga ine janapatengon, “Meghalaya Piggery Mission aro ma·mong sorkarini National Livestock Mission-oniko a·doko wak jilenggipa manderang bang·en namgnirangko man·aha,” ine Hek aganaha.
Meghalaya Piggery Mission ba National Livestock Mission-ko ra·na gita sorkari, niamrangko olgrokbatatahani gimin a·doko wak jilenggiparangoni komibeoba sak 500 manderang, namgnirangko man·aha ineba ua aganaha.
AH&V Minister-ni parakatani gitade, wak jilenggipa manderangni dorgastorangko man·soani ja·man department-ni officer-rang, manderangni wak jilchakgipa biaprangko nienga aro niam gita ong·genchimode, uamangna sorkarini on·enggipa namgnirangko on·enga.
Ia scheme-rangko ra·gatchengaoni changsanode wak jilenggipa pilak manderangna dakchakanirangko on·na man·jani gimin gadang gadang dake wak jilenggipa manderangna dakchakanirangko on·enga ineba ua aganaha.
“Ia bilsio chinga mang 500 wakrangko on·a ong·ode bilsigipino chinga bang·bate wakrangko on·gen aro uni ja·man re·baenggipa bilsirangoba iandake bariroroatgen. Ia scheme-ko name chu·sokatna man·genchimode aro manderang, ia scheme-ko name jakkalgenchimode, da·o bilsi 10-ni gisepon a·doko wak be·enrangko chu·onga gita man·gnok,” ine Hek aganaha.
Wak be·enko man·anio a·dok namen ja·manchakkuenga ine janapatskaengon, a·doko manderangna wak be·enrangko tikatna gita da·o dipet gipin a·dokrangonikon wakrangko brebana nangkuenga ine AH&V Minister parakataha.
 |
ReplyForward
|
