WILLIAMNAGAR: Pangna bilsian Easter-ko manianio a·sel ong·anirangko aro ramarango niam gri tangka gilanirangko nikna man·rongengani gimin ia chang Easter-ko tom·tomao manina man·na gita aro niam gri tangka gilanirangko champengna gita Garo Students Union (GSU) Eastern Zone Williamnagar, East Garo Hills a·jani dingtang dingtang biaprango awareness campaign-rangko ong·atenga.
Pangna bilsian Easter-ni salrango manderang, jinma picnic-rangko cha·anio, ramarango a·sel ong·ani, churing chupeke golmal ong·ani, chio sripe siani aro uandakgipa a·sel ong·anirangko nikna man·rongengani gimin ia changode East Garo Hills-ni GSU, an·tangtangna simsakgiparang ong·china, pangnan mikrake dongna aro niamko manichina gita ia awareness program-ko dingtang dingtang biaprango ong·atenga.
Gue, sal·wa, e·ching, matchu matte aro uandakgipa bosturangko salruragipa garirangoniko, NGO, Nokma Council, Municipality aro dingtang dingtang dolrangni bimingo niam gri tangka gile ra·anirang batroroengani gimin suk ong·gijaniko parakatskaengon, ian Indian Penal Code-ni Section 384 ning·o tangka gildrae ra·ani ong·a aro iandakgipa kamrangna sastiko man·na kraa ine GSU EZ parakataha.
“Iandake bostu salruraenggipa garirangoniko niam gri tangka gile ra·aniara bading chiwalgiparangna aro bosturangko salruraenggipa manderangnasan noksan ong·ataniko ra·baenga ong·ja indiba bazaar antirango bosturangni damko rakbatate ramram manderangna neng·nikanirangko ra·baani gita ong·enga,” ine GSU-EZ-ni president Goera R Sangma parakataha.
Ia awareness campaign-ni bak gita GSU-EZ, iandake tangka gile ra·rongenggipa biaprangona re·ange, manderangna mikrakatanirangko on·anggen ineba Sangma parakataha.
Iani bidingo apsan chanchirime ja·kuko de·na gita uamang, Pik-Up Association aro Nokma Council baksa tom·anirangko ong·atna miksongenga ineba GSU-EZ parakataha.
Iani bidingo GSU, dingtangmancha East Garo Hills a·jani SP-na chittikoba sedoataha aro garirangoniko niam gri tangka gilenggipa manderangko rim·enba rakgipa sastirangko on·china didiataha.
Easter-ko maniani salrango tom·tomaniko rakkiangchina gitaba GSU-EZ didiataha.
