TURA: Tura Town Bengali Higher Secondary School-o Garo subject-ko skigipa dongjani a·sel ia skulo poraienggipa A·chik chatro chatrirang neng·nikanirangko man·na nangenga ine A·chik Conscious Holistically Integrated Krima (ACHIK) dol parakataha.
ACHIK Krima Council-ni vice president aro secretary Richard JM Marak-ni parakatani gitade, ia skulara Bengali Higher Secondary skulsa ong·genchimoba ia skulo A·chik chatro chatrirangba poraienggiparang donga aro iani bidingo uamang skulni principal aro skigiparangko gronge sing·sandion, ia skulara deficit skulsa ong·ani gimin da·o dipet sorkarioni Garo skigipana sanction post-rang dongkuja ine u·iataha.
Batanggimin bilsirango Class 11 aro class 12-ni porikkarangko segipa A·chik chatro chatrirang, skulo Garo subject-ko skigipa dongjani a·sel MIL (Garo) subject-ko sena gita an·tangtangsa jotton ka·na nangaha aro gipin skulrango poraienggipa chatro chatriskarangonikosa note-rangko ra·chimonge porikkarangko sena nangahani gimin neng·nikanirangko chagrongna nangtokaha ineba skulni principal, ACHIK dolni dilgiparangna u·iataha.
Indake ong·engon, ia skulo Garo skigipa dongjagenchimode mikkangchiba A·chik chatro chatrirang neng·nikanirangko chagrongna nangangkugen ine ACHIK dolni vice president parakatenba, iani bidingo uamang bakan a·dok sorkari aro Education department baksa agangrikgen ine ku·rachakaniko on·ataha.
