SHILLONG: Garo Hills Autonomous District Council (GHADC)-o tangka paisani gita neng·nikanirangko man·engani a·sel council-o kam ka·enggipa manderangna dormaharangko on·na man·kujaengon, GHADC-o an·tangko Chartered Accountant (CA) ine tol·gipa mandena gong kror 8 tangkarangko gamaha ine Tura-ni MDC aro BJP-ni state vice president Bernard N Marak parakataha.
Marak-ni parakatani gitade, Tura-ni Sumit Kumar Jain minggipa mande saksa, an·tangko Chartered Accountant (CA) ine tol·enba, kajina gamaniko jokatna dakchakgen ine GHADC official-rangna ku·rachakaha indiba ja·mano ia mandeni gimin am·sandion, ia mandeo CA degree-ba dongja aro ia kamni gimin ma·sigipa ong·jachim ine ma·sina man·aha.
“GHADC-o kam ka·enggipa manderangnan somoi gita dormaharangko on·na man·jaengon, tol·gipa CA-na gong 8 tangkarangko chamaniara ra·chakna man·gijani ong·a. Ian manderangni tangka paisarangko jakkalsretani ong·a,” ine Marak parakatenba, ia mandena NPP-ni mitam dilgiparang chakpaaniko on·ani a·selsa indita tangkarangko gamna nangaha ine matnangataha.
Tura MDC-ni parakatani gitade, legislative session-ni somoio Taxation department, gong kror 8 tangkarangko consultancy service-na chamaha ine parakani ja·mansa iani bidingo ma·sina man·aha aro adita sak MDC-rang, iana chanchichipenba sing·dona a·bachengaha.
