SHILLONG: Meghalaya a·doko pass percentage-ko tang·doatnamangmang miksonganichi, NPP-chi dilenggipa MDA sorkari, a·doko lekka pora ra·aniko nosto ka·enga ine Tura-ni Lok Sabha MP Saleng A Sangma matnangataha.
“Ian ia sorkarini an·tangtangna biming man·na jotton ka·aniko mesokanisan ong·aia. An·chingo lekka porako ra·ani indinan namjaengaha aro ia sorkari, iako namjabatatenga. Uamang (sorkari) ia bewalon kamko ka·angkua ong·ode an·ching lekka porako ra·anio a·song gimiko namsrangjabatgipa ong·naba gnang,” ine Sangma, kobor ra·timgiparangna aganaha.
Pass ka·ani percentage-ko tang·doatnamangmangsan krengaiode mikkangchi a·dokni chatro chatrirang, neng·nikanirangko chagrongna nanggen ineba Sangma, mikrakataniko on·angaha.
“Pass ka·ani percentage-ko batatmangmangaiachide sorkari, an·tangni bimangko namdapatna man·jawa. Ian Meghalaya a·doko lekka porani kakket obostako mesokani ong·jaenga,” ine Tura MP aganaha.
Skango gitan skie on·ani aro nipiltaiani bewalrangko ra·gatpiltaichina didiangengon, ma·a paarang an·tangtangni dedrangko, bida budi ra·na aro mikkangchina tarisonasa skulrango watenga indiba iandakgipa bakkandikgipa cholrango pangchakna ong·ja ine Sangma aganaha.
CM’s Impact Guidebook-ko jakkalanina jegalatengon, ian chatro chatrirangko, textbook-rango pangchakjachina didiani gitasa ong·enga ine Sangma parakataha.
“Bi·sarang da·ode textbook-rangko nina nangjawaha inesa ma·siengaha maina uamang pass ka·namangmangde CM’s Guidebook-kosa nangaiaha. Indake ong·ode skulchiba maina re·kugen?” ine Sangma sing·doataha.
Iandakgipa pass ka·ani cholrangko man·engahani gimin chatro chatrirang, CUET aro NEET gita dakgipa porikkarangko sena an·tangtangko tarisona man·genma ineba Tura MP sing·doataha. “Iandakgipa porikkrangnaba Chief Minister, apsan dakgipa guidebook-ko ra·gatgenma?” ine Sangma sing·doangaha.
