A·dokni State University-ko kulianio chagrongna nangenggipa neng·nikanirangko nianga

TURA: Meghalaya a·dokni skanggipa State University, chong·motan Captain Williamson Sangma State University-ni academic session-ko ia bilsini August jaonin a·bachengna miksongengoba, ia University-ko kulianio dingtang dingtang neng·nikanirangko chagrongna nangkuengani gimin Sukrobar salo, a·dokni Education Minister Rakkam A Sangma aro Education Department-ni Advisor HM Shangpliang-ni dilanichi dingtangmancha tom·aniko, Balalgre-o donggipa University campus-o ong·atangaha.
Ia tom·anio a·dokni Education Minister, tom·anio bak ra·giparangna aganprakengon, chubata gadangrango poraienggipa chatro chatrirangni namgnina sorkari, ia University-ko ta·raken a·bachengatna nangnikenga ine university-ko kulianio chagrongna nangenggipa neng·nikanirangko namatna gita bakrime kamko ka·china didiangaha. Sangma-ni aganani gitade, ia University-ko kulianio a·a, bijoli, internet aro chirangko salanio neng·nikanirangko chagrongna nangkuengani gimin ia kamrangko ta·raken matchotatna gita sorkari, krenge kamrangko ka·enga.
Ia tom·anio, Education department-ni Advisor HM Shangpliang-ba aganprakengon, ia University-o chatro chatrirang name skie ra·na man·na gita dingtang dingtang neng·nikanirangko namatna nangengani gimin aganangenba, kamrangko ku·cholsan ong·e ka·china didianiko on·angaha.
Ia tom·anio Rangsakona constituency-ni MLA Subir Marak-ba tom·anio bak ra·giparangna aganprakengon, jolni chatro chatrirangna ia Capt Williamson Sangma State University-ni nangchongmotgipa ong·ani gimin janapangenba, matchotna nangkuenggipa kamrangko ta·raken matchotatchina didiangaha.
Iana skang, Capt Williamson Sangma State University-ni Vice Chancellor, Dr Vasanti Vijay Kumar, tom·anio bak ra·giparangna rimchaksoani kattarangko aganangengon, university-ko kulianio pilakni bakrimanikon nangenga ine didianiko on·angaha.
Ia tom·anio, Capt Williamson Sangma State University-ni Registrar Ambrose Ch Marak, Power Point Presentation-ko on·angskaengon, university-ko kulina kam ka·anio chu·sokatna man·gipa kamrang aro neng·nikanirangko talate on·angaha.
Ia University-ni academic session-ko re·baenggipa August ja dipetan a·bachenggnok aro iana syllabus, curriculum aro Prospectus-rangko tarimanaha ineba Marak parakataha.
Ia tom·aniko ong·atanio dingtangmancha security guard-rangni kamna aro Nokma-ni dedrangna on·gimin kamrangni appointment letter-rangkoba, a·dokni Education Minister, Education department-ni Advisor aro Rangsakona MLA-ni jakchi pakwate on·angjolaha.
Ia tom·anio bak ra·anggipa gipin manderangara, Meghalaya Board of School Education (MBOSE)-ni Executive Chairman CP Marak aro gipinrang ong·a.