TURA/SHILLONG: Ia sal somoirango India aro Pakistan a·songni gisepo so·sojengjeng ong·anirangko nikna man·engon, air raid ba aircraft-rangchi chadrapani somoirango manderangna naljokaniko on·na gita dakna nanggnirangko mesokna aro dingtang dingtang department-rang baksana dingtang dingtang dolrangna dakmesokna gita Budbar attamo dingtangmancha Mock Exercise-ko Tura-oba ong·atangaha.
Ia Mock Exercise-ko India a·songni salgro salaram jol gimikon aro Meghalaya a·dokoba Shillong, Jowai aro Tura jillarango ong·atangaha.
1971 bilsini Bangladesh War-ni ja·man ian skanggipa changna Meghalaya a·doko iandake Air Raid aro Black Out Mock Drill-ko ong·atangaha.
Ia Mock Drill-ko a·bachengatna gita Budbar attamni 6:28 bajio siren-ko gam·ataha aro uni ja·man joljol minute-gnina bijolirangkoba kimitaha.
Meghalaya a·dokni damgittam biaprangon, ia mock drill-ko ong·atanio bijolirangko minute-gnina kimitahani gimin andaltokaha indiba solar light-rangde bang·bata biaprangon teng·e dongskaaiaha.
Ia mock drill-ko ong·atanio gari gora aro manderangkode pangna gita re·na on·tokaiaha.
Ia mock drill-ko ong·atanio Civil Defence department baksana Emergency Service aro dingtang dingtang dolrangba bak ra·angtokaha.
Iana skang, ia Mock drill-ko ong·atani bidingo Civil Defence & Home Guards Directorate-ni Senior Staff Officer aro Additional PRO PH Shylla, talataniko on·angengon, bobilrangni aircraft-rangchi chadrapani somoirango manderangna naljokaniko on·na gita a·song gimikon ia mock drill-ko ong·atna Home Affairs Ministry ge·etaniko on·ahani gimin Meghalaya a·dokoba ia Mock Drill-ko dakaha ine parakataha.
Iani bidingo Civil Defence-ni Joint Director MK Sangma-ba kobor ra·timgiparangna talataniko on·angengon, dingtang dingtang a·songrangni gisepo dakgrikanio Civil Defence-ni tarisamsoe donganiko nina ia Civil Defence Exercise-ko ong·ataha ine parakataha.
Somoirang bakkandikahani gimin ian Civil Defence Exercise-ni skanggipa bak gitasan ong·aiaha aro mikkangchi iandakgipa exercise-rangko nambate ong·atanggen ineba Sangma parakataha.
