TURA: India aro Pakistan a·songni gisepo so·sojengjeng ong·engani gimin manderangni gisepo kenjokanirang ong·katengon, West Garo Hills a·jao da·o dipet cha·ani bosturang, jekai merong, dal, aro uandakgipa bosturang chu·onga gitan donga ine West Garo Hills a·jani Deputy Commissioner (Supply) talataniko on·ataha.
A·song damgnini gisepo so·sojengjeng ong·anirangko nikna man·engon, West Garo Hills a·jao manderangna nangchongmotgipa cha·ani bosturang komiaha ine social media-o tol·gipa koborrangko on·ahani gimin Deputy Commissioner, ia talataniko on·angaha.
West Garo Hills a·jao cha·ani bosturang dongangjaengaha ine social media-rango kobor on·aniara kakket ong·ja ine talataniko on·angengon, iandake tol·gipa koborrangko on·aniara manderangni gisepo kenjagokataniko aro tom·tome janggi tanganiko golmal ka·a gita ong·a ine Deputy Commissioner parakataha.
Iandakgipa tol·gipa koborrangko social media-rangko watrikrikjachina manderangko didiatengon, cha·ani bosturangko salantian Supply department-ni official-rang nirokjringenga aro da·o dipet bosturang chu·onga gitan donga aro damrangba apsan ong·en dongkuenga ine Deputy Commissioner parakataha.
