TURA: Common University Entrance Test (CUET)-ko Garo Hills-ni chatro chatrirang, gipin biaprangona sena nangengani a·sel korosrang ong·e neng·nikanirangko chagrongna nangtokenga ine Garo Hills Deficit School Teachers Association (GHDSTEA) parakatenba, Garo Hills-ni chatro chatrirang, biaptangon donge sena man·na gita CUET centre-rangko chu·onga gita on·china sorkariko didiataha.
GHDSTEA-ni president James D Shira-ni parakatani gitade, Garo Hills-ni chatro chatrirang, Khasi aro Jaintia Hills a·jarangosa CUET-ko sena nangengani a·sel basakobarangde antigimikrang dongna nange chatro chatrirang, mongsongbate cholgri ong·pagipa chatro chatrirangde koros amchakjae neng·nikanirangko chagrongna nangtokenga.
“CUET centre-rangko sualanio biapni kri ong·jaengani a·sel chatro chatrirang, tangka paisa, gisik aro be·en bimangni gitaba neng·nikanirangko chagrongna nangenga. Garo Hills-o bang·bata chatro chatrirangan tangka paisani gita cholgri ong·giparangsa ong·e, gipin biaprangona re·ange CUET-ko sena nanganiara namen ong·na amgijani ong·enga aro iandakgipa neng·nikanirangko chagrongna nangtokengani giminan bang·bata chatro chatrirangan CUET seaniko dontonggiparangba donga,” ine GHDSTEA-ni president parakataha.
NTA-ni gita porikkani tarikrangko tik ka·ani bidingo janapatengon, paper kingsako badiaba tariko ong·atode gipin paper minggnikode salgni ba salgittamrang ja·mansa ra·skaenga aro mitamrangde dingtang dingtang paper-na dingtang dingtang centre-rangosa sena nangengani a·sel chatro chatrirang neng·nikanirangko chagrongna nangenga ine Shira parakataha.
 |
ReplyForward
|
