WILLIAMNAGAR: Ia bilsini Secondary School Leaving Certificate (SSLC) porikkao chatro chatrirang bang·batan pass ka·ahaoba, East Garo Hills a·jani higher secondary aro college-rango seat-rang chu·ongjae, admission-ko man·tokjaengani gimin chatro chatrirangni namgnina ia pilak higher secondary skul aro college-rangon morning aro evening shift-rangko kulidapchina A·chik Organisation for Social Welfare (AOSW) dabiangaha.
Iani bidingo a·dokni Education Minister Rakkam A Sangma aro PHE Minister Marcuise N Marak-na seachi u·iatengon, East Garo Hills a·jani higher secondary skulrango aro college-rango chu·onga gita seat-rang dongjani a·sel ia bilsini SSLC porikkako pass ka·gipa ritchani ritcha chatro chatrirang, admission-ko man·jae neng·nikanirangko chagrongna nangtokenga ine AOSW-ni secretary Premier Sangma parakatenba, ia higher secondary skulrango aro college-rango morning aro evening shift-rangko kulie on·china didiataha.
East Garo Hills a·jani higher secondary skulrango aro college-rango morning aro evening shift-rangko kuligenchimoba ia skul aro college-rango skigiparangna kamrang jakchakgijani ong·skagen ineba AOSW, ia higher secondary skulrangna aro college-rangna Adhoc ba guest lecturer-rangko songe on·skachina a·dok sorkariko didiataha.
