SHILLONG: Tura-ko Winter Capital songchina dabiani ja·man Jowai-koba Summer Capital songchina Jaintia Students Union (JSU) dabiskaengon, ia dabianio Rajya Sabha-ni MP WR Kharlukhi-ba chakpaaniko on·angaha.
Rajya Sabha MP WR Kharlukhi-ara, JSU-ni gitcham president-ba ong·achim ine nikna man·a.
Jowai-ko Summer Capital songchina dabianio chakpaaniko parakatengon, Jaintia Hills jolrangba sorkarini kamrango nambate nirok sandianiko nangengani gimin ua an·tangba ia dabianio chakpaaniko on·enga ine Kharlukhi aganaha.
“Angni chanchiani gitade, Jaintia Hills-ba maikobade man·na nanga. Jowai-ko Summer Capital songchina JSU dabiaha aro angaba skango JSU-ni president ong·paani gimin ia dabianio angaba chakpaaniko on·enga,” ine ua aganaha.
Tura-ko Winter aro Jowai-ko Summer Capital songchina dabienggipani bidingo janapatengon, “Sorkarini kamrangko manderangona sokatna gitade, Shillong-kosan skotong dake ra·ani ong·jawa. Winter aro Summer Capital-ko on·na man·aigen aro iano maming ong·gijani dongja. Skangode chingni Jaintia Raja dongachim aro uni uni winter capital-ko Jandapur-o aro summer capital-ko Nartiang-o dakachim. Apsan daken da·alo a·dokni dingtang dingtang biaprangko capital dake songna man·aigen,” ine Rajya Sabha MP aganaha.
Iana skang, Jowai-ni MLA Wailadmiki Shylla-ba Jowai-ko Summer Capital songchina dabianio chakpaaniko on·angenba, manderangba ia dabianiko nangnikenga ong·ode ua sorkari baksa iani bidingo agangrikgen ine ku·rachakaniko on·angaha.
Tura-ko Winter Capital dake songchina Garo Hills-ni dingtang dingtang dolrang dabitokengani gimin adita salrangna skang, Assembly-ni Budget Session-ko ong·atani somoion sorkari, pilak party-rangni committee-ko songna gitaba tik ka·angaha.
