Gnigipa bako gong kr 15-ko chamgen
SHILLONG: Sombar salo, mikkarang jime waengmiting somoio a·dokni Chief Minister Conrad K Sangma, Shillong songjinmani gitchambatsranggipa bazaar, Iewduh ba Bara Bazar-ona re·angenba, ia bazar-ko mikkangchi manderangni namgnina nambate taridapgen ine ku·rachakaniko on·angaha.
Chief Minister baksana Deputy Chief Minister Prestone Tynsong, Tourism Minister Paul Lyngdoh, dingtang dingtang department-ni official-rang aro jolni dilgiparangba dongpaaha aro uamang, ia bazaar-o nalarang gita chi jokruruengani a·sel manderangni neng·nikanirangko ma·sie ra·bana man·aha.
Ia biapko nianganio ua bading chiwale cha·enggipa aro dokkan dakenggipa manderangkoba gronge, uamangni neng·nikanirangko sing·sandie ra·angaha aro mikkangchi ia biaprangko nambate tarina ku·rachakaniko on·angaha.
Ia biapona re·ange niangani ja·man kobor ra·timgipa manderang baksa agangrikengon, skanggipa bako ia Bara Bazar-ni ning·ao manderang re·rurana gita ramako tarie on·aha aro ja·mano ia bazar-ko nitobatatna gita mongsonggipa kamrangkoba ka·gen ine parakataha.
“Skanggipa bako gong kror 6 tangkarangko chamataha, gnigipaoba kror 15 tangkarangko chamatgen aro uni ja·man dingtang dingtang kamrangkoba jako ra·e ka·anggen,” ine Sangma aganaha.
Ia kamni gnigipa bakna ta·raken tender-ko on·na ka·dongenga aro jagnimangni gisepon kamrangko a·bachengna man·naba gnang ineba Sangma aganaha.
Ia project-ko sorkari NEC scheme-ni ning·o donatahani gimin mitam tangkarangkode NEC-oni aro mitam tangkarangkode sorkari an·tangan koros ka·gen ineba Chief Minister parakataha.
