TURA: Tura-o donggipa Printing & Stationery department-ni office-ko dikdiksana gipin biapona apjitchengna manchienggipani bidingo West Garo Hills a·jani Government Branch Press Industrial Employees Association (GBPIEA), Shillong-o donggipa Printing & Stationery department-ni Director-na sedoatenba, adita ku·pattianirangko on·ataha.
Iani bidingo department-ni Director-na seachi u·iatengon, Tura-o donggipa office-ko gipin biapona apjitchengna manchiengani gimin GBPIEA-ni membor-rang, suk ong·gijaniko parakatenba, minggittam ku·pattianirang, chong·motan office-ni bosturangko donchakna aro bakgittam section-o kam ka·enggipa sak 80 manderangna chaknagipa biapko sandichina, ba da·o office dakenggipa biapkon retaining wall on·e taridapchina ba residential quarter-rango rikenggipa gital permanent building-ko ta·rake matchotatchina didiataha. Ia gital office-ko matchotkujaskal, da·o office dakenggipa biapon kamrangko ka·na on·kuchina gitaba GBPIEA-ni membor-rang, department-ni Director-ko didiataha.
Association-ni parakatani gitade, da·o ia office-ko dikdiksana apjitchengna miksongenggipa biapara Najing Bazar jolosa ong·ani gimin ian office-ni kamrangko ka·chakna kragipa biap ong·ja aro ia biapo kamrangko ka·chakna gitaba chu·ongjani gimin uamang ia biapona apjitaniko jegalenga.
Residential quarter-rang donggipa biapo rikenggipa gital building-ko matchotani ja·man chu·gimik office-ko ia gital building-ona apjitanikode uamang jegalenga ong·ja ine janapatengon, iani bidingo uamangni mol·molaniko knachakchina GBPIEA-ni membor-rang, Printing & Stationery department-ni Director-ko didiataha.
