ADC-rangna 15th Finance Commission-ni scheme-rangko on·ani bidingo chanchirima

SHILLONG: Meghalaya a·dokni damgittam autonomous district council (ADC)-rang, chong·motan Khasi Hills Autonomous District Council (KHADC), Jaintia Hills Autonomous District Council (JHADC), aro Garo Hills Autonomous District Council (GHADC)-ni ning·o donggipa urban constituency-rangnaba 15th Finance Commission-ni namgnirangko on·na man·na gita Mongolbar salo, a·dokni Deputy Chief Minister aro District Council Affairs (DCA) Minister Prestone Tynsong-ni dilanichi, ia damgittam ADC-rangni dilgiparang aro official-rang baksa tom·e chanchirimangaha.
Ia tom·aniko ong·atani bidingo kobor ra·timgipa manderangna talate on·angengon, ADC-rangna 15th Finance Commission-ni recommend ka·gipa grant-rangko on·ani bidingo chanchirimangaha indiba ia ADC damgittamni ning·o ga·akgipa jillarang, mongsongbate Shillong, Jowai aro Tura jillarangna ia scheme-rangko sokatanio adita neng·nikanirangko chagrongna nangenga ine Tynsong parakataha.
“15th Finance Commission-ni recommend ka·gipa scheme-rangara mongsongbate songadam nokadamrangnasan ong·bataia aro jillarangna on·ani giminde mamingkon janapani dongja. Jillarangoba ADC-ni mitam constituency-rangko man·chapani gimin ian jajaaniko ong·atenga,” ine ua aganaha.
15th Finance Commission-ni grant-rangko ADC-ni ning·o ga·akgipa urban constituency-rangnaba sokatna man·na gita iani bidingo cholrangko sandichina a·dok sorkari, Urban Affairs department-na pakwate on·angaha ineba Tynsong parakataha.
“Da·alo chinga damgittam ADC-rang aro nangchakegipa department-rang baksa ning·tue chanchirimaha aro cholrangko sandichina chinga Urban Affairs department-na pakwate on·angaha. DCA-ni Commissioner & Secretary-koba iani bidingo ADC-rang baksa kobor ra·grikchina anga ge·etaha,” ine Deputy CM aro DCA Minister aganaha.
Iani bidingo maming somoirangko tik ka·jahaoba ADC damgittamkon ta·rake kam ka·china ua u·iataha ineba Tynsong aganaha.
“15th Finance Commission-ni term, re·baenggipa 2026 bilsini March jaon bon·engahani gimin ta·raken kamrangko ka·china anga damgittam ADC-rangko aganaha. Ia grant-rangko man·na gita da·o adita jarangasan dongaiaha. Ia grant-rangko urban constituency-rangni MDC-rangba man·china chinga nangnikenga,” ine ua aganaha.
Ian da·o dipet matchotsranga ong·kuja aro chanchirimna nanganirang dongkuenga ineba DCA Minister parakataha.