TURA: Deficit skulrango skigiparang March aro April jani dormaharangko man·tokkujaengani gimin ia dormaharangko ia antini gisepon on·na gita sorkari ku·rachakaniko on·ataha ine Garo Hills Deficit School Teachers & Employees Association (GHDSTEA) parakataha.
Bristibar salo, GHDSTEA aro Khasi Jaintia Deficit School Teachers Association (KJDSTA)-ni dilgiparang baksa tom·e chanchirimanio ia ku·rachakaniko a·dokni Education Minister Rakkam A Sangma on·ataha.
“Chinga da·al Bristibar salni bako Education Minister-ko grongenba, chingni man·na nangkuenggipa jagnini dormaharangni gimin agangrikaha aro ua chingni dormaharangko ia antini gisepon watatgnok ine ku·rachakaniko on·ataha. Dormaharangko on·na man·ningjahani giminba ua a·selrangko chingna talate on·aha,” ine GHDSTEA-ni president James D Shira parakataha.
Iana agreba GHDSTEA-ni dilgiparang, Education Minister-ko grongeanio, deficit skulrango skigiparangna jaantian aro somoi gita dormaharangko on·china, Centralized Provident Fund Scheme (CPFS)-ko on·ani bidingo talataniko on·china aro deficit skulrango skigiparangnaba National Pension Scheme (NPS)-ko on·china didiangaha.
“Chingni dabianirangna Education Minister name aganchakaha aro ia pilak dabianirangkon ua name nichengna ku·rachakaniko on·ataha,” ine GHDSTEA-ni president parakataha.
Deficit skigiparangni dormahako ia antini gisepon on·na sorkari ku·chaka
Date:
Share post:
