SHILLONG: Tura Medical College-ko Public-Private Partnership (PPP) mode-o chalaina tik ka·aniko sorkari jako ra·angkua ong·ode iani kosako ua raken jegalangkugen ine Sukrobar salo, Opposition aro Trinamool Congress (TMC)-ni dilgipa Mukul Sangma, ku·rachakaniko on·angaha.
Tura Medical College-o bilsio sak 150 MBBS chatro chatrirangko ra·e PPP mode-o chalaina gita, gisiko nangenggipa aro kamna choligipa India-ni private company-rang baksa bakrimna adita salrangna skang a·dok sorkari, Expression of Interest (EoI)-na okamahani gimin Opposition dolni dilgipa, iako raken jegalangkuna tik ka·angaha.
An·seng baljokani aro lekka porani kamrangko private company-rangni jako on·jachina sorkariko didiatengon, medical college-rangara a·dokna mongsonggipa sanchakgipa biaprang gitaba ong·a aro a·doko sorkarichi chalaienggipa medical college-rangko, manderangna nangchongmotenga ine Sangma parakataha.
Ia sal somoirango bang·a nokdangrangan sanna banani korosrangko amchaktokjaengani a·sel neng·nikanirangko chagrongna nangtokenga ine janapatskaengon, sorkari medical college-ko kulianichi pilakan ia college aro hospital-o sanna bananirangko ra·pana chol ong·gen ine Sangma parakataha.
“Sanna bananirango dam rakdugaengani a·selan bang·a nokdangrang, gro jinang daktokna nangengani gimin manderang, sorkarini sanchakram biaprango sanna bananirangko ra·na man·na gita sorkari cholrangko on·na nanga,” ine ua aganaha.
Tura Medical College & Hospital-ko PPP mode-o chalaigenchimode ian a·dokna mikkangchi namen gimaaniko ra·bana sienga ine janapatskaengon, ia medical college aro hospital-ko private company-rangchi chalaigija an·tangtangan chalaichina gita Opposition dolni dilgipa, a·dok sorkariko didiataha.
“Ia medical college aro hospital-ko PPP mode-o a·bachengatgen indiba ja·manode ian chu·gimik private hospital-sa ong·aignok. Uni gimin a·doko songdongenggipa manderangni namgnina ia medical college-ko PPP mode-o chalaigija chu·gimik sorkarichin chalaina nanga,” ine ua aganaha.
