TURA: Resubelpara Civil Sub-Division-ko 2012 bilsion chu·gimik North Garo Hills a·ja songahaoba da·alonan police-rangni bilde sub-division-ni somoio gitan apsan ong·e dongkuengani a·sel kamrangko ka·anio neng·nikanirangko chagrongna nangenga ine A·chik State People’s Front (ASPF) parakatenba, North Garo Hills a·jao police dolrangni bilko bilakdapatchina a·dok sorkariko didiataha.
Iani bidingo a·dokni Home Minister Prestone Tynsong-na sedoatengon, North Garo Hills a·jao 2012 bilsion songahaoba da·alonan police-rangkode nangani kri bariatkujaenga a·sel kamrangko ka·anio neng·nikanirangko chagrongna nangenga ine ASPF-ni general secretary Bernita Marak parakataha.
“Chingni kobor man·soani gitade, North Garo Hills-ko man·chengaonin Superintendent of Police (SP) aro Additional SP-ni kamrangna agrede gipin kamrangko aro sipairangko on·dapa dongkujaengani a·selan sub-division-ni somoio apsan bil ong·a gitan ong·kuenga. Iandake North Garo Hills a·jana police-rangko aro police-rangni bilrangko on·dapkujaengani a·selan niam retiko rakkianio aro manderangna chel·chakaniko on·anio kamrangko name ka·na man·jaenga,” ine ASPF-ni general secretary parakataha.
North Garo Hills a·jana da·o on·enggipa police dolrangara, dingtang dingtang kamrang, jekai manderangko chel·chakani, ong·gija dakgipa kamrangko warachakani aro manderang baksa ku·mong nangrimgrikanio kamrangko ka·na chu·ongjaenga ine janapatengon, ia sal somoirango North Garo Hills a·jao manderangni jelbra jelsuaniko nie, sipai dolrangko baridapatna nangchongmotengaha ine Marak parakataha.
“Uni gimin North Garo Hills a·jao police-rangko nangani kri rakkidapchina chinga nang·ko mande ra·bean baksa mol·molenga aro mongsongbate, police station-rango, outpost-rango, OGC-rango aro pilak anti-dacoity (AD) camp-rango sipairangko bariatchina didienga. Iandake police-rangko baridapatanichi manderangna chel·chakaniko aro ong·gija dakanirangko nambate nirok sandiangna man·gen,” ine ASPF-ni general secretary parakataha.
