TURA: West Garo Hills a·jani dingtang dingtang chiring chibisikrango jabol galaniko champengna gita West Garo Hills a·jani District Magistrate, Section 163 BNSS-ni ning·o ge·etaniko on·angaha.
Chiring chibisikrango moila ong·ataniko champengna dongimin Water (Prevention and Control Pollution) Act 1974-ni Section 24-o on·gimin niamrangko ja·rikchina gitaba District Magistrate, West Garo Hills a·jani ning·o songdongenggipa pilak manderangnan ge·etaniko on·ataha.
Water (Prevention and Control Pollution) Act 1974-ko ja·rikchina ge·etaniko on·angengon, jabolrangko, chiring chibisikrango, chiakolrango ba uandakgipa chimarango skatang galjachina gita West Garo Hills a·jani District Magistrate, pilak market committee-rangnaba ge·etaniko on·angaha.
An·tangtangni bazar-rango jabol galanirangko name nirokchina gitaba District Magistrate, pilak bazar committee-rangna ge·etaniko on·angaha.
Chisamrango donggipa homestay, resort aro picnic cha·chakgipa biaprangni nokgiparangkoba, jabol galchakanirangko name tarichina aro samtangtango ong·telaigiparangko chel·chakna dongimin niamrangko ja·rikchina gita District Magistrate ge·etangaha.
Ia niamko West Garo Hills a·jani ning·o bilake ja·rikchina ge·etaniko on·atengon, banoba ia niamko manigija chiring chibisikrango jabol galako nikgenchimode, uandakgipa manderangni kosako rakgipa ja·kurangko de·china gita District Magistrate, Tura Municipal Board-ni Chief Executive Officer aro Sub-Divisional Magistrate-na ge·etaniko on·ataha.
Dingtang dingtang gittimo songdongenggipa manderangko aro dingtang dingtang dolrangkoba iani bidingo nirok sandianirangko dakchina aro banoba niam pe·giparangko nikgenchimode ta·raken bilo ong·enggipa official-rangna u·iatchina gita District Magistrate didiataha.