SHILLONG: A·doko batanggimin salgittamrangna dondipgija mikka jimnee waonin dingtang dingtang biaprango sak 6 manderang siaha aro sak 4 manderang jokkom ong·an baksanaba a·dokni gimikon biapon nosto ong·anirangko man·engaha.
A·bachengao sakgni sigipa baksa sak 4 Sonibar salo sidapaha.
Kharang songni bilsi bilsi 14 ong·gipa me·a bi·sa Mebanskhem Mukhim bol pangpike uo ga·akdapako man·e siaha.
Dadenggre C&RD Block-ni Kentapara songoni bilsi 7 aro bilsi 13 ong·gipa me·chik bi·sa sakgni Batgrikchi A Sangma aro Brime D Sangma mikka kimpretapani a·sel siaha.
Bilsi 36 ong·gipa Nikolas Kharpran, Mawduk songni Umlew chiringo chi man·pakangako man·e siaha. Ua Bhoirymbong-ni Kyrdeng songo donggipa ong·achim.
A·doko May 29-oni 31 tarikona mikka dondipgija waanichi a·dokni ge-23 block-rangni dam 49 songrangna bate neng·nikaniko man·tokaha ine Meghalaya State Disaster Management Authority-ni Cumulative Report-ko parakataha.
Ge-33 rika cho·anirang nosto ong·tokan baksana sak 1094 manderang neng·nikaniko man·aha.
A·doko mikka jimbee waanichi bang·a agansona man·gijagipa a·selrang ong·aha. Nongstoin-ni Mawkadiang songo Sukrobar salo a·a rurongdapaha. Apsan dakgipa a·sel Umling block-ni Amjok songo ong·aha.
Aukrobar salo Sumer Latara-oba a·a rurongaha. Aro May 31 tariko Greater Shillong-ni Ardhenu Chaudhurui-o bang·gija a·a rurongaha.
Kalatek Shella-o chi banani somoio nok te-2-ko chi man·pakangaha.
Mylliem,Pynursla, Mawsynram aro Shella Block-ni ning·o dingtang dingtang songrango bijolirang dongjae neng·nikaniko man·angaha.
Ri-Bhoi district-ni Sumer Latara, Umsning block-o chi bananichi aro a·a rurongdapanichi neng·nikaniko man·gipa nokdang ge-10-na nangchongmotgipa bosturangko sualangaha.
