SHILLONG: Madhya Pradesh a·dokni Indore songjinmaoni re·bagipa tourist sakgnini Sohra jolo gimaani da·o sal 10 gapengaha indiba da·alonan gimaenggipa tourist sakgniko man·pilkujaenga.
Bia ka·daldale re·bagipa jiksesa, chong·motan Sonam Raghuwanshi aro Raja Raghuwanshi, re·anggipa May 22 tariko, Mawlakhait songona sokbae, songo manderangko re·dilgipa Bah Wansai baksa Nongriat-ni Double Decker Root Bridge-ko nina re·angahachim. Uamang Nongriat-o, Shipara Homestay-o waltue, May-ni 23 tariko Mawlakhait-ona re·angpilna gita ia homestay-oni re·ongkatangaha indiba ua somoionin uamang jiksesa nikpiltaijaha.
May-ni 24 tariko, uamangni para ra·e re·anggipa scooty-ko Sohrarim-oniko man·aha aro iani ja·mansa uamangni gimaani bidingo police-rangna FIR ka·angaha.
Iana skang, May-ni 22 tariko uamang, Saitsohpen Sohra-o donggipa Manha Homestay-oba napangahachim indiba ia homestay-o biap dongjani gimin aro mikkarang jimbee waengani gimin an·tangtangni bakosrang baksa biming aro phone nomborko on·e, uamang gipin biapko sandina re·angaha aro ja·manosa uamang Nongriat-ona re·angaha ine official-rang parakataha.
Indake ong·engon, ia jiksesako sandina gita a·dok sorkari, Police aro SDRF dolrang baksana songni manderangkoba gimik sak 50-mangni gita, dingtang dingtang biaprango jakkalenga aro je biaprangona manderang re·angna neng·beani ong·achim, uandakgipa biaprangoniko sandina gita K9 sniffer dog-rang baksana drone-rangkoba jakkalenga ine official-rang parakataha.
Gimaenggipa tourist-rangko sandina gita police dolrang aro songni manderangba walang salang rakbee kamrangko ka·enga ine a·dokni Chief Minister Conrad K Sangma-ba parakataha.
“SP, district administration, police-rang, gimaenggipa jiksesako salo konta 24-na sandienga. Sorkarini manderangsan ong·ja indiba dingtang dingtang songni manderangba ia jiksesako sandianio dakchakanirangko on·paenga,” ine Chief Minister aganaha.
“Ia manderangko sandianio chinga pilak donga technology-rangkode jakkalenga indiba ian wachini somoi ong·ani kamko ka·anio neng·nikanirangko chagrongna nangenga. Indiba chinga ia sakgniko ta·raken sandina jotton ka·enga,” ineba ua aganaha.
