TURA: North Garo Hills a·jani A·dokgre jolrango higher secondary skulrang chu·onga gita dongjani a·sel ia bilsini Secondary School Leaving Certificate (SSLC) porikkako pass ka·gipa chatro chatrirang, admission-ko man·jae neng·nikanirangko chagrongna nangtokengani gimin A·dokgre-o donggipa damsamangmang higher secondary skul, chong·motan Rashtriya Madhyamik Shiksha Abhiyan (RMSA) skulko dal·batatchina didie Garo Students Union (GSU) A·dokgre regional unit, a·dokni Chief Minister Conrad K Sangma-na sedoataha.
Chief Minister-na sedoatgipa chittio GSU A·dokgre regional unit-ni parakatani gitade, A·dokgre jolrango higher secondary gadang donggipa skul RMSA-mangmangsan dongaia indiba ia skulo skigiparang aro biaprang chu·ongjani a·sel chatro chatrirangko nangana bate ra·na man·jaenga.
“A·dokgre RMSA-o skigiparang aro skul nokrang chu·onga gita dongjani a·sel chatro chatrirangko ra·dapna chol ong·jaenga aro ia bilsini SSLC porikkako pass ka·gipa bang·a chatro chatrirangan biaprangko man·jae neng·nikanirangko chagrongna nangtokenga,” ine GSU A·dokgre regional unit-ni dilgiparang parakatenba, ia skulona re·bae nieachina aro ia skulo biaprangko aro skigiparangkoba bariatchina Chief Minister-ko mol·molataha.