SHILLONG: Sombar salo sogimin manggisiko man·gipa Raja Raghuvanshi-ko ma·sina man·kugijagipa manderangsa, attechi so·ota ine Mongolbar salo, East Khasi Hills a·jani Superintendent of Police (SP) Vivek Syiem parakataha.
Iani bidingo kobor ra·timgiparangna talataniko on·angengon, ia mandeko so·otna jakkalgipa atteko aro mobile phone-ko police-rang, biap damsaoniko man·aha ine SP parakataha.
“Ia mandeko attechi so·otakon ine chinga chanchichipenga maina ia mandeni manggisiko man·gipa samba jolonikon atte baksana mobile phone-koba man·aha. Ia atteko niode online-o bregipa ong·na krae nika,” ine Syiem aganaha.
Sing·anirangna aganchakaniko on·angkuengon, ia mandeko so·otna a·bachengonin chanchisamsoa donga gita nika aro iani bidingo police-rang, so·otani case-ko segatenba ning·tubate sandirokengkua ine SP parakataha.
“Raja-ko a·kuangchi galonatna skangan so·otama ma galonatani ja·mansa uko attechi so·otama name ma·sina man·kujaenga. Post mortem report-ko man·ahaosa chinga iani bidingo talbate ma·sina man·gen,” ine ua aganaha.
Ia mandeni jikgipa Sonam Raghuvanshi-ni gimin sing·anina aganchakskaengon, Mongolbar saloba police-rang, SDRF aro NDRF-ni sipairang baksa Wei Sawdong jolrangoniko sandiahachim indiba da·o dipet uko man·kujaengani gimin Budbar saloba uko sandiangkugen ine SP parakataha.
Indake ong·engon, Raja Raghuvanshi-ni siani a·selko talbate ma·sina man·na gita Central Bureau of Investigation (CBI)-chi sandirokchina gita ia mandeni ma·drangrangba Meghalaya sorkario dabiangaha.
Raja Raghuvanshi-ni manggisiko, uamangni donanggipa scooty-oni kilometer 25-mang chel·ao donggipa a·kuangonikosa man·ahani gimin saobarangsa uamangko ua biapona rimange so·ote galaha ine sianggipa Raja-ni jonggipa Vipin Raghuvanshi, ia a·selko CBI-ni sandirokchina a·dok sorkari aro police-rangko didiangaha.
Vipin-ni aganani gitade, uamang jiksesaan sonani gandingrangko ganani gimin aro ma·manti gamchatgipa bosturang dongani gimin saobarangsa uamangni gam-jinrangna mikboke, uamangko so·otengnaba gnang.
Raja-ni jikgipa Sonam Raghuvanshi-ko tange man·pilchina gitaba ua a·dok sorkariko didiangaha.
